ԱԺ-ն ընդունեց նաև «Պետական և ծառայողական գաղտնիքի մասին» ՀՀ օրենքում փոփոխություններ կատարելու մասին» նախագիծը
12:47, March 22, 2013 | Մամլո հաղորդագրություններ | Տեղեկատվության եւ խոսքի ազատություն
2013 թ. մարտի 21-ին ՀՀ Ազգային ժողովը երկրորդ ընթերցմամբ և ամբողջությամբ ընդունեց «Պետական և ծառայողական գաղտնիքի մասին» ՀՀ օրենքում փոփոխություններ կատարելու մասին» օրենքը:
Ըստ օրենքի նոր նախագծի՝ գերատեսչական ցանկերը չեն գաղտնագրվում և ենթակա են հրապարակման, բացառությամբ այն դեպքերի, երբ դրանցում ընդգրկվող կոնկրետ տեղեկության անվանումը ինքնին կարող է իրենից պետական կամ ծառայողական գաղտնիք ներկայացնել: Ընդ որում գերատեսչական ցանկերում ընդգրկվող տեղեկության անվանումն իր ամրագրման փաստի ուժով պետական կամ ծառայողական գաղտնիքի շարքին դասելու չափանիշները պետք է սահմանվեն համապատասխան լիազոր մարմնի կողմից:
Օրենքի մեջ փոփոխություններ կատարելու անհրաժեշտությունն առաջացել է Հելսինկյան Քաղաքացիական Ասամբլեայի Վանաձորի գրասենյակի դիմումի հիման վրա ՀՀ սահմանադրական դատարանի կողմից կայացրած որոշումից հետո:
Դեռևս 2011 թ. նոյեմբերի 23-ին ՀՔԱ Վանաձորի գրասենյակը դիմում է ներկայացրել ՀՀ Սահմանադրական դատարան՝ «Պետական գաղտնիքի մասին» ՀՀ օրենքի 8-րդ և 12-րդ հոդվածների դրույթները ՀՀ Սահմանադրության 3-րդ, 5-րդ, 6-րդ, 27-րդ և 43-րդ, 83.5-րդ, 117-րդ հոդվածներին հակասող և անվավեր ճանաչելու վերաբերյալ: Կազմակերպության լիազորված ներկայացուցիչներ են եղել Արտակ Զեյնալյանը և Արայիկ Ղազարյանը:
Իսկ 2012 թ. մարտի 6–ին ՀՀ Սահմանադրական դատարանը կայացրել է որոշում «Պետական և ծառայողական գաղտնիքի մասին» Հայաստանի Հանրապետության օրենքի 12-րդ հոդվածի 7-րդ մասի «Գերատեսչական ցանկերը գաղտնագրվում են և հրապարակման ենթակա չեն» դրույթը` այնքանով, որքանով չի վերաբերում գաղտնագրման ենթակա կոնկրետ տեղեկության, ճանաչել ՀՀ Սահմանադրության 27-րդ և 43-րդ հոդվածների պահանջներին հակասող և անվավեր:
Գործի նախապատմությունը սկսվում է դեռևս 2010 թ. փետրվարի 10-ից, երբ ՀՔԱ Վանաձորի գրասենյակը տեղեկատվության հարցմամբ դիմել էր ՀՀ պաշտպանության նախարարին` խնդրելով տրամադրել տեղեկատվություն 2009 թ. ՀՀ զինված ուժերում ծառայության ընթացքում մահացած ժամկետային և պայմանագրային զինծառայողների թվաքանակի, նրանց անունների, ազգանունների և հասցեների վերաբերյալ: Պաշտպանության նախարարությունը մերժել է տրամադրել պահանջված տեղեկատվությունը՝ հիմնավորելով, որ այն հանդիսանում է ծառայողական գաղտնիք: Իսկ ըստ օրենքի կարգավորումների՝ գաղտնիք է համարվում նաև ՀՀ պաշտպանության նախարարի կողմից հաստատված «ՀՀ պաշտպանության նախարարության գաղտնագրման ենթակա տեղեկատվությունների ընդլայնված գերատեսչական ցանկը»: