0 8000 12 11

ՊՆ ՔԾ եզրակացության համաձայն, նրանց գործողություններն ակնհայտ համապատասխանում են անհրաժեշտ պաշտպանության հատկանիշներին: Հիշեցնենք, որ, ինչպես երեւում է հունիսի 2-ին Սուրիկ Խաչատրյանի առանձնատան մոտ տեղի ունեցած դեպքի հրապարակված տեսանյութից, Տիգրան Խաչատրյանը կրակել էր Ավետիք եւ Արտակ Բուդաղյանների ուղղությամբ: Այդ օրը Ավետիք Բուդաղյանը սպանվեց, Արտակ Բուդաղյանը` ծանր վիրավորվեց:

Քննչական մարմինը ապացուցված է համարել սպանված Ավետիք Բուդաղյանի մեղքը, եզրակացնելով, որ վերջինս է կատարել սպանության եւ դիտավորությամբ առողջությանը ծանր վնաս պատճառելու հոդվածներով նախատեսված արարքներ: Բուդաղյանի նկատմամբ քրեական հետապնդումը դադարեցնելու որոշում է կայացվել նրա մահվան պատճառով։ Իսկ Արտակ Բուդաղյանի մասով գործը կարճված չէ:

Այս որոշումը ոչ միանշանակ է ընդունվել քաղաքական ուժերի եւ իրավապաշտպան կազմակերպությունների եւ, բնականաբար, Բուդաղյանների հարազատների կողմից: Նրանք կբողոքարկեն այն: Ավետիքի եւ Արտակի հայրը` Էմիլ Բուդաղյանը, գտնում է, որ քննիչը Սուրիկ Խաչատրյանի որդու եւ թիկնապահի դատապաշտպանի դեր է կատարել եւ դա արել է զինդատախազ Գեւորգ Կոստանյանի ուղղորդմամբ: «Եթե դատախազը հրահանգած չլիներ, ինչ իրավունք ունեին այդ գործը կարճելու: Կոստանյանը վերեւից հանձնարարական է ստացել եւ իր քննիչին դարձրել նրանց ադվոկատը: Թե ում կողմից է ստացել` Սերժ Սարգսյանի, ԱԺ նախագահի, թե ում, դա ես չգիտեմ, բայց որ հանձնարարել են, դա փաստ է»,-ասաց Է. Բուդաղյանը:

«Դեպքից հետո բոլոր գործողությունները, որոնք իրավապահ մարմինների կողմից իրականացվել են, ապօրինությունների շարան է, հանցավոր անգործություն: Ավելին, այդ անգործությանը իրավական գնահատական չտալը` դատախազության կողմից, ի դեմս Գեւորգ Կոստանյանի, նույնպես կոպիտ խախտում է»,-մեկնաբանելով որոշումը՝ մեր զրույցում ասաց Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը: Գործի քննությունը ՊՆ քննչական ծառայությանը հանձնելը նա մեծ խախտում է համարում: Իրավապաշտպանը կարծում է, որ դա քաղաքական որոշման արդյունք է: «Զինդատախազի կողմից հրապարակային արված գնահատականները` մինչեւ փորձաքննությունների անցկացումը, քննության վրա ուղղակի ազդեցություն ունեցող եւ ուղղորդող նշանակություն ուներ, որը նույնպես հանցագործություն է: Նա կանխորոշում էր, թե ով է մեղավոր լինելու, ով` անմեղ»,- ասաց Սաքունցը, ՊՆ ՔԾ շաբաթօրյա որոշումն անվանելով արդարադատության բռնաբարություն օրը ցերեկով: «Ստացվում է, որ հարձակվողները տուժել են, իսկ նրանք, ում վրա իբր հարձակվել են, ոչ մի վնասվածք չեն կրել: Ավելին, «հարձակվողներից» մեկը մահացել է, մյուսը ծանր վիրավորանք է ստացել: Էն հրացանը, որ եղել է Արտակ Բուդաղյանի մեքենայում, լիցքավորված չի եղել: Հարձակվողն առանց փամփուշտների է՞ գնում»,- փաստերն ամփոփեց ՀՔԱՎ ղեկավարը: Արթուր Սաքունցի կարծիքով, ՊՆ ՔԾ այս որոշումն ուղղակի ապտակ է մեր ԶՈւ սպաներին, որով ցույց է տրվում, որ ոչ միայն սպաները պաշտպանված չեն օլիգարխներից, այլեւ ծառայեցվում են ռեժիմին: «Որոշում է կայացվել հովանավորելու Լիսկային եւ իր ընտանեկան բանդային: Բայց իր բովանդակությամբ սա նույնիսկ քաղաքական էլ չի: Սա ուղղակի մաֆիոզ մտածելակերպի տիպիկ արտահայտություն է, երբ պետական լծակները, լիազորությունները եւ գործառույթները ակնհայտորեն քրեական փիլիսոփայության եւ տրամաբանության տեսակետից են կիրառվում ՀՀ քաղաքացիների նկատմամբ: Սա մարտահրավեր է յուրաքանչյուրիս: Սա ինդիկատոր է իշխանության որակի եւ բնույթի մասին»,- ասաց իրավապաշտպանը: Մեր հարցին, թե ինչու՞ է Սերժ Սարգսյանը հետեւողական կերպով շարունակում Խաչատրյանի հանդեպ հովանավորությունը, Արթուր Սաքունցը պատասխանեց. «Դե երեւի Սարգսյանի հանցագործություններն էլ կոծկել է Լիսկան: Սերժ Սարգսյանի համար Լիսկան համարվում է լավագույն գործիքներից մեկը` իր իշխանությունը պահպանելու համար: Լիսկան ունիվերսալ գործիք է»:

Սյունիքի նախկին մարզպետի որդու եւ թիկնապահի ազատ արձակման եւ գնդապետ Բուդաղյանի նկատմամբ քրեական հետապնդումը շարունակելու ՊՆ ՔԾ որոշման վերաբերյալ զգուշավոր էին արտահայտվում որոշ քաղաքական ուժեր: ՀՅԴ ներկայացուցիչ Արծվիկ Մինասյանը մեր հարցերին ի պատասխան ասաց, որ հարցը չի ուսումնասիրել եւ չի կարող որեւէ բան ասել: «Էդ թեմայով ես հիմա չեմ ուզում խոսել»,-ասաց ԱԺ ընդդիմադիր խմբակցության պատգամավորը: «Ժառանգություն» կուսակցության ներկայացուցիչներից մեկնաբանություն ստանալ չհաջողվեց: ԲՀԿ խոսնակ Տիգրան Ուրիխանյանը մեզ հայտնեց, որ տեղյակ չէ այդ որոշման իրավաչափության աստիճանից, որպեսզի կարողանա բնորոշել:

Երեկ այս թեմայով ասուլիս էր հրավիրել Բուդաղյանների շահերի ներկայացուցիչ Հայկ Ալումյանը: Փաստաբանը լրագրողներին տեղեկացրել է, որ քրեական գործով մեղադրյալը մեկն է, ինչպես վերը նշեցինք` Արտակ Բուդաղյանը, իսկ տուժողը` Լորետա Բարսեղյանը, Սուրիկ Խաչատրյանի կինը:

Աղբյուրը՝ http://armtimes.com/44266