0 8000 12 11

Վարչական դատարանի Գյումրու նստավայրում այսօր նշանակված էր ԳԱԼԱ-ի լրատվական ծառայության մեքենայի վարորդ Արմեն Պետրոսյանի հայցի քննությունն ընդդեմ ճանապարհային ոստիկանության գործով հերթական դատական նիստը: Սակայն հերթական անգամ նիստը չի կայացել: Այս անգամ դատավոր Էդիկ Նահապետյանը պատճառաբանել է հայցվորի բացակայությունը դատական նիստին՝ չնայած որ հայցվորի ներկայացուցիչ Հելսինկյան Քաղաքացիական Ասամբլեայի Վանաձորի գրասենյակի իրավաբան Արայիկ Զալյանը ժամանակին ներկայացել է նիստին ու նկատել, որ նիստի համար նշանակված ժամին՝ 14:30-ին դատական նիստերի դահլիճը լքում են ճանապարհային ոստիկանության ներկայացուցիչները, ինչը նշանակում է, որ դատական նիստը մեկնարկել է նախատեսված ժամանակից շուտ, եւ հայցվորի բացակայությունը պատճառաբանելով՝ դատավոր Էդիկ Նահապետյանը որոշել է հետաձգել նիստը: Սա նշանակում է, որ գործի քննությունն արհեստականորեն հետաձգվում է ինչ-ինչ հանգամանքներով պայմանավորված՝ ԳԱԼԱ-ի լրագրողի հետ զրույցում նման կարծիք է հայտնել ԳԱԼԱ-ի լրատվական ծառայության մեքենայի վարորդ Արմեն Պետրոսյանի ներկայացուցիչ Արայիկ Զալյանը: Եթե պատճառը միայն հայցվորի բացակայությունն էր, ապա նիստը կարող էր հետաձգվել կես ժամով, ինչպես նախորդ նիստին դատարանի կողմից դա  իրականացվեց, երբ նիստին չէր ներկայացել պատասխանող կողմը՝ ճանապարհային ոստիկանության ներկայացուցիչները:

Արայիկ Զալյանի կարծիքով՝ ներկայացված հայցը հիմնավոր ու փաստարկված է, ուստի եւ հայցի քննության ձգձգումը պայմանավորված է ավելի շատ դրանով, մանավանդ որ դատարանը պատրաստվում էր որպես վկա հարցաքննել ԳԱԼԱ-ի աշխատակիցներին: Ինչպես արդեն հայտնի է, մարտի 25-ի կեսօրին Գյումրու ՃՈ աշխատակիցները հանկարծակի ներկայացել էին ԳԱԼԱ հեռուստաընկերության աշխատակից Արմեն Պետրոսյանի բնակարան և առանց ծանուցագրի կամ պատճառաբանության նրան ստիպել ներկայանալ ՃՈ, իսկ մեքենան տեղափոխել էին տուգանային հրապարակ:

Աղբյուրը՝ http://www.galatv.am/news/view/police_3009.html