Գնահատականը համարժեք է
06:12, January 23, 2014 | Այլ լրատվամիջոցներ, Նորություններ
Միջազգային Human Rights Watch իրավապաշտպան կազմակերպությունը հրապարակել է իր հերթական տարեկան զեկույցը աշխարհում մարդու իրավունքների պաշտպանության վերաբերյալ, որտեղ անդրադարձել է նաև Հայաստանում նախորդ տարի տեղի ունեցած ՀՀ նախագահի և ՏԻՄ ընտրություններին, հավաքների ազատության, ակտիվիստների վրա հարձակումների, բանակում չարաշահումների, խոսքի ազատության, սեռական կողմնորոշման և գենդերային ինքնության խնդիրներին:
Ըստ այդ զեկույցի՝ ոստիկանությունում պահվող անձանց նկատմամբ շարունակվում են վատ վերաբերմունքի դեպքերը, հեռարձակվող ԶԼՄ-ների շրջանում առկա է բազմակարծության պակաս, և տարվա ընթացքում լրագրողների և ԶԼՄ-ների աշխատակիցների նկատմամբ բռնության և ոտնձգության մի քանի միջադեպեր են պատահել: Զեկույցում կան անդրադարձներ, որոնք վերաբերում են հավաքների ազատությունը խոչընդոտելուն և ակտիվիստների վրա կատարված հարձակումներին: Անդրադարձ կա նաև Շանթ Հարությունյանի և նրա ընկերների ակցիային ու դրա հետևանքով նրանց կալանավորման փաստին, բանակում չարաշահումների փաստերին, ոստիկանությունում ձերբակալված անձանց նկատմամբ կիրառված խոշտանգումներին, ինչպես նաև այլ ոլորտներում մարդու իրավունքների ոտնահարման դեպքերին:
Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը irates.am-ի հետ զրույցում համարժեք համարեց զեկույցում հնչեցրած գնահատականները:
«Զեկույցում առանձնացրել են մարդու իրավունքների՝ առավել ակնհայտ խախտումները, որոնք ավելի համակարգված և շարունակական բնույթի են»,- մեր զրույցում նշեց իրավապաշտպանը: Ըստ մեր զրուցակցի՝ զեկույցում մանրամասն անդրադարձը Հայաստանի ընտրություններին, հավաքների, խոսքի ազատությանը ցույց է տալիս, որ մեծ ուշադրություն են դարձրել Հայաստանին:
Աղբյուրը՝ http://www.irates.am/hy/1390397216