0 8000 12 11

«Մենք հիմքեր չունենք բացառելու, որ կլինեն մարդիկ, որոնք չեն զորակոչվի, հատկապես որոշակի արտոնյալ կարգավիճակ ունեցողները` պաշտոնատար անձանց երեխաները և որոշակի հովանավորություն ունեցողները»,- անդրադառնալով ձմեռային զորակոչի անցկացման կարգին` Newsbook-ի հետ զրույցում ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:

Ըստ իրավապաշտպանի, զորակոչի վիճակահանությամբ անցկացումը, թե ով որտեղ է գնալու ծառայության, երկրորդական հարց է. «Առաջնայինը բուժզննում է, որը որոշում է երիտասարդների ծառայության պիտանելիության հարցը, սակայն կան արտոնյալներ, որոնք այդ բուժզննումն անցնում են ոչ սահմանված կարգով»:

Փաստը, որ վիճակահանությունը կարող է նվազեցնել կոռուպցիոն ռիսկերը, Սաքունցը չի բացառում. «Վիճակահանությամբ ծառայության կարգի որոշումը կոռուպցիոն ռիսկերի նվազեցմանն ուղղված քայլերից մեկն է, բայց ես վիճակահանությանը չեմ մասնակցել և ականատես չեմ եղել, որպեսզի միանաշանակ եզրակացություն տամ»:

Սաքունցի հավաստմամբ` վիճակահանության կարգի անցկացման մեջ բավական չպարզված հարցեր կան. «Նախ երեք արկղ է, մեկը չի, այդ վիճակահանության մասնակիցների տարանջատման սկզբունքը հիմնավորված չէ, սրանք պատասխաններ չունեցող հարցեր են»,- հավելեց Սաքունցը:

Աղբյուրը՝ http://newsbook.am/?p=23360&l=am/klinen+artonyalnervoronq+bugznumy+chen+ancni+sahmanvac+kargov+artur+saquncy+zorakochi+masin