Փաստաբան Շարբաթյանի սպանության գործով վկաները հրաժարվում են նախաքննական ցուցմունքներից
06:16, December 6, 2013 | Այլ լրատվամիջոցներ, Նորություններ | Արդար դատաքննության իրավունք, Կյանքի իրավունք
Փաստաբան Սամվել Շարբաթյանի սպանության քրեական գործով դեկտեմբերի 3-ին տեղի ունեցած դատական նիստում սպանված փաստաբանի քույրը` վկա Անժելա Ասլիկյանը և նրա դուստրը` վկա Տաթևիկ Ասլիկյանը, ում շուրջ ծագած վեճի արդյունքում էլ 2012թ. նոյեմբերի 18-ին Շահումյան գյուղի Մուշ ռեստորանում սպանվել է փաստաբանը, հրաժարվեցին իրենց նախաքննական ցուցմունքների առանձին պարբերություններից: Անժելա Ասլիկյանը քրգործով ներգրավված վկա, զինվորական ծառայության մեջ գտնվող Հայկ Ասլիկյանի մայրն է, Տաթևիկ Ասլիկյանը` քույրը:
Անժելա և Տաթևիկ Ասլիկյանները, ինչպես հարցաքննված նախորդ վկաներ Հայկ Ասլիկյանը և Էդուարդ Խլղաթյանը, դատարանում հայտնեցին, թե նախաքննական ցուցմունքներ տալիս իրենց ուղղորդել է քննիչը: Այսուհանդերձ, անվրեպ չէր, որ մայր և դուստր վկաները, հրաժարվելով իրենց նախաքննական որոշ ցուցմունքներից, դատարանում փորձում էին ցուցմունք տալ Հայկ Ասլիկյանի` նոյեմբերի 5-ի դատական նիստին տված ցուցմունքներին համահունչ: Տաթևիկ Ասլիկյանը դատարանում հայտնեց, որ 2012թ. նոյեմբերի 29-ին քննիչին տված իր ցուցմունքի վերջին պարբերությունում նշել է տվյալներ, որոնց մանրամասներին չի տիրապետել. «Բայց քանի որ ինչ-որ վերջաբան պետք է գրվեր, և ես չգիտեի` ինչպես է եղել կռիվը, քննիչն ինձ ասաց, որ Հայկը ցուցմունքում նման բովանդակությամբ է գրել: Ես էլ դրա վրա հենվելով` գրեցի նույնը»,- ասաց վկան: Այդուհանդերձ, քննիչի կողմից ուղղորդման հետ կապված` դատավոր Նարինե Հովակիմյանի հարցերին Տաթևիկ Ասլիկյանի պատասխանները խուսափողական էին:
-Այսինքն` քննիչը Ձեզ պատմեց Հայկի ցուցմունքի բովանդակությունը,- հարցրեց դատավորը:
– Էնտեղ կռվի հետ կապված, էլի եմ ասում, մանրամասնորեն ոչինչ չի ասել, թե ովքեր են եղել և ում մեջ է վիճաբանությունը եղել,- պատասխանեց վկան:
-Քննիչը հայտնեց այդ մասին Ձեզ, ասաց,- հարցրեց մեղադրողը:
-Քննիչը ինձ հարցրեց. «Ինչ գիտես վիճաբանությունից»: Ես այն ժամանակ էլ ասացի, որ մանրամասներին չեմ տիրապետում և գիտեմ, որ անհավասար վիճաբանություն է եղել, բայց թե ում հետ, ինչպես` չեմ տիրապետում: Քննիչը ինձ ասաց, որ Հայկը այսպես է գրել, քեզ էլ է այդպես ասել: Ես իրեն պատասխանեցի` ոչ, բայց որ ինքը` Հայկը, այդպես է գրել, ես էլ այդպես կգրեմ:
Մեղադրող Պետրոս Մարտիրոսյանի հարցին, թե վկան իր ցուցմունքի մասին խոսել է եղբոր հետ, այսինքն` եղբորը չի հարցրել, թե ինքը քննիչին նման ցումունք է տվել, թե ոչ:
-Էդ հարցրել եմ, Հայկն ասաց, որ` այո, ես այդպիսի ցուցմունք եմ տվել: Ի պատասխան մեղադրողի հարցի` Տաթևիկ Ասլիկյանն ասաց, որ քննիչին ցուցմունք տալու հենց առաջին օրն է Հայկին դա ասել: «Ես Հայկին ասել եմ` ես այսպիսի ցուցմունք եմ գրել, ես քո ցուցմունքի հիման վրա ցուցմունք եմ տվել քննիչին, դու տվել ես նման ցուցմունք: Հայկն ասաց` հա, տվել եմ»: Ապա մեղադրող դատախազ Պետրոս Մարտիրոսյանը դատարանին ներկայացրեց վկա Տաթևիկ Ասլիկյանի նախաքննական ցուցմունքը: Մեղադրողը վկային խնդրեց ընդհատել իրեն, եթե հանդիպի իր ցուցմունքում այնպիսի մտքերի, որոնք իրենը չեն. «Սեղանից վեր կենալով և ռեստորանից դուրս գալիս սրահում տհաճ խոսակցություն է եղել քեռու, Արտակի և Սամվել Դիլոյանի միջև: Մուտքի մոտ սկսել են իրար հայհոյել և քաշքշել»: Վկա Տաթևիկ Ասլիկյանը ընդհատեց մեղադրողին: «Այդ մանրամասները ես Հայկից չեմ լսել»,- ասաց վկան, սակայն խնդրեց մեղադրողին շարունակել ցուցմունքը: «Այդ ընթացքում հայհոյելու համար քեռին ապտակել է ինչ-որ մեկին, որից հետո խառը կռիվ է սկսվել: Հայկը տեսնելով, որ չի կարողանում խափանել կռիվը, օգնության է կանչել Խլղաթյան Էդոյին: Ու մինչև վերադառնալը տեսել է, որ Արտակը, Չուգունը (Արեն Վերանյանը) և Դիլոյան Սամվելը ոտքերով հարվածում են քեռուն` գլխին և ոտքերի տարբեր մասերին: Ըստ Հայկի պատմելու` նրանք գազանաբար ծեծել են քեռուն, որն արնաշաղախ ընկած է եղել գետնին: Նաև նրանցից ինչ-որ մեկը կրակել է քեռու վրա, որից հետո ծեծողները փախել են այդտեղից»,- նախաքննական ցուցմունքում հայտնել է Տաթևիկ Ասլիկյանը: Մեղադրողը ցուցմունքն ընթերցելուց հետո հարցրեց վկային. «Դուք Ձեր ցուցմունքից հետո անմիջապես անցաք այս պարբերությանը: Ինչու»: Վկայի պատասխանները, սակայն, մեղադրողը չցանկացավ լսել. «Եթե դատարանն ուզում է լսել, կարող է շարունակել»,- ասաց նա:
Դատարանում 4 ժամ շարունակ հակասական ցուցմունքներ տվեց փաստաբան Սամվել Շարբաթյանի քույրը` վկա Անժելա Ասլիկյանը: Վերջինս նույնպես հայտնեց, թե նախաքննական իր ցուցմունքն ուղղորդվել է քննիչի կողմից: Մեղադրող Պետրոս Մարտիրոսյանն Անժելա Ասլիկյանին խնդրեց բացատրել` ինչ է նշանակում ուղղորդել բառը: Վկան չկարողացավ բացատրել: Վկաների ցուցմունքներից հետո պաշտպանական կողմը դատարանում հանդես եկավ հայտարարություններով: Ամբաստանյալներ Սամվել Դիլոյանի և Արեն Վերանյանի շահերի պաշտպան Ռուբեն Հակոբյանը, ի պատասխան մեղադրող Պետրոս Մարտիրոսյանի` դատարանում հայտնած այն տեսակետի, թե ցուցմունքների արդյունքում 3 մեղադրյալ ամբաստանյալի աթոռին են հայտնվել, պատասխանեց. «Ոչ, ցուցմունքների արդյունք չէ, դա ոչ պրոֆեսիոնալիզմի արդյունք է»: Տուժողի իրավահաջորդ Հասմիկ Մանուչարյան պահանջեց դատարան հրավիրել վարույթն իրականացնող քննիչին: Հաջորդ դատական նիստը տեղի կունենա դեկտեմբերի 17-ին:
Պաշտպանների հայտարարությունները դիտեք տեսանյութում: