ՀՀ վերաքննիչ քրեական դատարանում շարունակվում է ԼՂՀ մեկուսարանում մահացած Հայկ Մովսիսյանին տուժող ճանաչելու պահանջով ներկայացված բողոքի քննությունը
11:37, July 1, 2014 | Նորություններ, Սեփական լրատվություն | Արդար դատաքննության իրավունք, Զինծառայողների/Զորակոչիկների իրավունքներ | Զինված ուժեր
2014 թ. հունիսի 30-ին ՀՀ վերաքննիչ քրեական դատարանում, նախագահությամբ դատավոր Հ. Տեր-Ադամյանի, քննության առնվեց ԼՂՀ քննչական մեկուսարանում մահացած Հայկ Մովսիսյանի մոր՝ Հեղինե Պետրոսյանի ներկայացուցիչներ Արթուր Սաքունցի և Արայիկ Զալյանի վերաքննիչ բողոքը: Հիշեցնենք, որ սույն գործով նախորդ դատական նիստին վարույթն իրականացրած մարմինները չէին ներկայացել՝ աշխատանքային ծանրաբեռնվածության պատճառով, իսկ դատարանը, ղեկավարվելով դատավարության կողմերի հավասարության սկզբունքով, որոշեց հետաձգել վերաքննիչ բողոքի քննությունը՝ վարույթն իրականացրած մարմինների ներկայությունն ապահովելու նպատակով:
2014 թ. հունիսի 30-ի դատական նիստին, սակայն, վարույթն իրականացրած մարմինները՝ ՀՀ ՀՔԾ պետի տեղակալ Մ. Բաբայանը և ՀՀ գլխավոր դատախազության ավագ դատախազ Վ. Բադալյանը կրկին չէին ներկայացել: Նախագահող դատավորը տեղեկացրեց, որ վերջիններս պատշաճ ծանուցվել են, սակայն չներկայանալու մասին դատարանին որևէ գրություն չեն ուղարկել: Դիմումատուի ներկայացուցիչ Արթուր Սաքունցը վերաքննիչ բողոքի քննությունը վարույթն իրականացնող մարմինների բացակայությամբ շարունակելու հարցի լուծումը թողեց դատարանի հայեցողությանը: Նախագահող դատավոր Հ. Տեր-Ադամյանը գտավ, որ վարույթն իրականացրած մարմինների չներկայանալը խոչընդոտ չէ վերաքննիչ բողոքի քննության համար և որոշեց շարունակել դատական նիստը:
Հեղինե Պետրոսյանի ներկայացուցիչ Արթուր Սաքունցը ներկայացրեց վերաքննիչ բողոքի հիմնավորումները և պահանջեց բեկանել ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2014 թ. մայիսի 19-ի որոշումը, ընդունել նոր դատական ակտ, թիվ 62202513 քրեական գործով Հայկ Մովսիսյանին ճանաչել տուժող, Հեղինե Պետրոսյանին ճանաչել տուժողի իրավահաջորդ, ՀՀ ՀՔԾ քննիչ Մ. Բաբայանին պարտավորեցնել տրամադրել քրեական գործով վարույթը կարճելու մասին որոշումը և կարճված գործի նյութերի պատճենները:
Նախագահող դատավոր Հ. Տեր-Ադամյանը տեղեկացրեց, որ չնայած նախորդ նիստը հետաձգվել էր 2014 թ. հունիսի 30-ին մինչև օրվա վերջ աշխատելու պայմանով, սակայն օբյեկտիվ պատճառներով, այն է՝ դատարանի ծանրաբեռնվածությունը կալանավորման գործերով, բողոքի քննությունը ենթակա է հետաձգման:
Հեղինե Պետրոսյանի ներկայացուցիչներ Արթուր Սաքունցի և Արայիկ Զալյանի վերաքննիչ բողոքի քննությունը կշարունակվի 2014 թ. հուլիսի 4-ին, ժամը 11:00-ին: