0 8000 12 11

2017 թ. ապրիլի 6-ին ՀՀ Վարչական դատարանում, նախագահությամբ՝ դատավոր Կ. Զարիկյանի, հրապարակվեց Ժ. Սեֆիլյանի նկատմամբ կալանքը որպես խափանման միջոց ընտրելու՝ նախաքննական մարմնի միջնորդության քննարկման ժամանակ 2016 թ. հունիսի 22-ին տեղի ունեցած հավաքի վայրից ֆիզիկական ուժի գործադրմամբ ոստիկանության բաժին տեղափոխված, «Հայ կանանց ճակատի» անդամ Սուսաննա Սիմոնյանի դեմ ՀՀ Ոստիկանության հայցի քննության արդյունքում կայացված դատական ակտը:

Դատարանը, բավարարելով ՀՀ Ոստիկանության հայցը, որոշեց Ս. Սիմոնյանին ենթարկել վարչական պատասխանատվության 30.000 ՀՀ դրամի չափով տուգանքի ձևով: Որոշմամբ արտահայտված դիրքորոշման համաձայն՝ դատարանը հրապարակայնորեն ոստիկանության ծառայողի վրա թքելու գործողությունը համարել է վիրավորանք, որի համար Վարչական իրավախախտումների վերաբերյալ  օրենսգրքով նախատեսված է վարչական պատասխանատվություն:

Դատարանը մասնակի բավարարեց նաև Ս. Սիմոնյանի և վերջինիս ներկայացուցչի հակընդդեմ հայցը՝ ոչ իրավաչափ ճանաչելով ոստիկանության կողմից ֆիզիկական ուժ գործադրելու գործողությունները, իսկ ՀՀ ոստիկանության՝ ձերբակալելու, ձերբակալման ժամանակ չներկայանալու, վիրավորելու և առանց նրա համաձայնության տեսանկարահանելու գործողությունները ոչ իրավաչափ ճանաչելու պահանջների մասով մերժեց:

Այս համատեքստում դատարանն ընդգծում է, որ դրանք նախ ենթակա են քրեաիրավական գնահատականի և միայն հանցակազմի բացակայության պայմաններում կարող են ստուգվել վարչադատական կարգով՝ որպես վարչարարություն: Ս. Սիմոնյանին վիրավորելու առնչությամբ դատարանը գտել է, որ առկա չէ դա հաստատող այնպիսի ապացույց, որի հետազոտումից հետո դատարանի մոտ չէին մնա չփարատված կասկածներ: Իսկ Ֆիզիկական ուժ գործադրելու մասով դատարանը հաստատված է համարել այն հանգամանքը, որ ոստիկանության ծառայողները, առանց որևէ պահանջի կամ նախազգուշացման, ֆիզիկական ուժ են գործադրել հայցվորի նկատմամբ, իսկ պահանջի բացակայության պայմաններում բացակայում է ֆիզիկական ուժի գործադրման անհրաժեշտությունը: