Ցուցարարների գործով հակընդդեմ հայցեր են ներկայացվել՝ ոստիկանության գործողությունները ոչ իրավաչափ ճանաչելու պահանջով
10:45, December 12, 2016 | Նորություններ, Սեփական լրատվություն | Ոստիկանություն
2016 թ. դեկտեմբերի 8-ին ՀՀ Վարչական դատարանում նշանակված էր այս տարվա մարտին Գևորգ Սաֆարյանի կալանքի ժամկետը երկարաձգելու վերաբերյալ միջնորդության քննարկմանն ընդառաջ կազմակերպված հավաքի մասնակից Նաիրա Բադալյանին վարչական պատասխանատվության ենթարկելու պահանջով ՀՀ Ոստիկանության հայցի քննությունը:
Նախնական դատական նիստի ընթացքում, որին մասնակցում էին ՀՀ Ոստիկանության ներկայացուցիչ Սոնա Մելիքյանը, պատասխանող Ն. Բադալյանի ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանը, դատարանը հայտնեց, որ 2016 թ. դեկտեմբերի 2-ին դատարան է մուտքագրվել Ն. Բադալյանի հակընդդեմ հայցադիմումը ՀՀ Ոստիկանության գործողությունները ոչ իրավաչափ ճանաչելու պահանջով: Հակընդդեմ հայցը վարույթ ընդունելու հարցի վերաբերյալ որոշում կայացնելու հիմքով դատական նիստը հետաձգվեց:
Հայցը վարույթ ընդունելու մասին որոշումն ավելի ուշ տրամադրվեց կողմերին:
Նույն հիմքով հետաձգվեց նաև նույն հավաքի մեկ այլ մասնակից Գեղեցիկ Տոնոյանի գործով 2016 թ. դեկտեմբերի 8-ին ՀՀ Վարչական դատարանում կայացած դատական նիստը:
Վերջինիս շահերը ևս ներկայացնում է ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանը:
Հաջորդ նախնական դատական նիստերի մասին կողմերը կծանուցվեն:
Դատարան ներկայացված հայցով ՀՀ Ոստիկանությունը պահանջել է վարչական պատասխանատվության ենթարկել հավաքի մասնակիցներին՝ ՀՀ Վարչական իրավախախտումների վերաբերյալ օրենսգրքի 180.1-րդ հոդվածի (Հավաքներ անցկացնելու` օրենքով սահմանված կարգը խախտելը) 11-րդ և 15-րդ կետերի պահանջներով:
Հիշեցնենք՝ հավաքի մի շարք մասնակիցներ ֆիզիկական ուժի գործադրմամբ բերման էին ենթարկվել և տեղափոխվել ՀՀ Ոստիկանության Երևան քաղաքի վարչության Կենտրոնականի բաժին, որտեղ նրանց նկատմամբ իրականացվել էր վարչական վարույթ՝ հավաքի մասնակցի կողմից իր պարտականությունները չկատարելու ու հավաքի խաղաղ և բնականոն ընթացքի ապահովման վերաբերյալ ոստիկանության` օրենքով սահմանված պահանջները չկատարելու հիմքով: