ՄԻԵԴ-ը վճիռ է կայացրել <<Մատաղիսի>> գործով
20:16, March 17, 2016 | Նորություններ, Սեփական լրատվություն | Ազատության և անձնական անձեռնմխելիության իրավունք, Խոշտանգումներից և անմարդկային կամ արժանապատվությունը նվաստացնող վերաբերմունքից զերծ մնալու իրավունք
Այսօր՝ մարտի 17-ին, Մարդու իրավունքների եվրոպական դատարանը վճիռ կայացրեց «Զալյանը և մյուսները՝ ընդդեմ Հայաստանի Հանրապետության» գործով, որով ճանաչեց ՄԻԵԿ 3-րդ (Խոշտանգումների արգելում) և 5-րդ (Ազատության և անձնական անձեռնմխելիության իրավունք) հոդվածներով նախատեսված իրավունքների խախտումները:
Համաձայն ՄԻԵԴ որոշման՝ ՀՀ Կառավարությունը որպես բարոյական փոխհատուցում ընդհանուր առմամբ պետք է վճարի 50.000 եվրո, որից 20.000 եվրո՝ Արայիկ Զալյանին, 15.000-ական եվրո՝ Մուսա Սերոբյանին և Ռազմիկ Սարգսյանին:
Հիշեցնենք, որ 2004 թ. ապրիլի 19-ին ԼՂՀ Մատաղիսի զորամասի ժամկետային զինծառայողներ Արայիկ Զալյանը, Մուսա Սերոբյանը և Ռազմիկ Սարգսյանը հրավիրվել են հրամանատարի սենյակ՝ 2003 թ. դեկտեմբերին սպանված երկու զինծառայողների գործով հարցաքննության նպատակով: Սկզբում նրանք հարցաքննվել են որպես վկաներ, ապա զինվորական ղեկավարությունը փորձել է բռնությամբ ստիպել, որ վերջիններս ընդունեն մեղքը:
Ի տարբերություն Ա. Զալյանի և Մուսա Սերոբյանի՝ Ռազմիկ Սարգսյանը ճնշումների ներքո ընդունել է իր և երկու ծառայակիցների մեղքը:
2005 թ. մայիսին Արայիկ Զալյանը, Մուսա Սերոբյանը և Ռազմիկ Սարգսյանը դատապարտվել են նախ՝ 15 տարվա, ապա՝ ցմահ ազատազրկման և ազատազրկման վայրում անցկացրել 3 տարի:
2012 թ. դեկտեմբերի 18-ին նրանք արդարացվել են:
ՄԻԵԴ ներկայացված գանգատով դիմումատուներ Արայիկ Զալյանը, Մուսա Սերոբյանը և Ռազմիկ Սարգսյանը պահանջել էին ճանաչել Մարդու իրավունքների եվրոպական կոնվենցիայի 3-րդ (Խոշտանգումների արգելում) և 5-րդ (Ազատության և անձնական անձեռնմխելիության իրավունք) հոդվածներով նախատեսված իրավունքների խախտումները: