Ռուստամ Ղազարյանը՝ ընդդեմ ՀՀ ԱՆ «Նարկոլոգիական հանրապետական կենտրոն» ՓԲԸ-ի
15:36, September 17, 2015 | Մամլո հաղորդագրություններՏեղեկացնում ենք, որ 2015թ. սեպտեմբերի 18-ին՝ ժամը 14:30-ին, Երևան քաղաքի Ավան և Նոր-Նորք վարչական շրջանների ընդհանուր իրավասության դատարանում տեղի կունենա Ռուստամ Ղազարյանի գործով հերթական նախնական դատական նիստը:
Ռուստամ Ղազարյանի խախտված իրավունքների պաշտպանությամբ զբաղվում է ՀՔԱ Վանաձորի գրասենյակը:
Դատարան ներկայացված հայցով Ռ. Ղազարյանը և վերջինիս ներկայացուցիչ, ՀՔԱ Վանաձորի գրասենյակի իրավաբան Տաթևիկ Սիրադեղյանը պահանջել են վերականգնել Ռ. Ղազարյանի խախտված իրավունքները՝ վերացնելով ՀՀ ԱՆ «Նարկոլոգիական հանրապետական կենտրոն» ՓԲԸ-ի՝ Ռ. Ղազարյանի վերաբերյալ կազմած բժշկական փաստաթղթերում որպես թմրամոլ առկա գրառումներն ու հաշվառումը:
Հիշեցնենք, որ Ռ. Ղազարյանը ՀՀ ԱՆ «Նարկոլոգիական հանրապետական կենտրոն» ՓԲԸ-ում հաշվառման է վերցվել իր դեմ հարուցված քրեական գործով կատարված տոքսիկոքիմիական փորձաքննության եզրակացության հիման վրա՝ առանց համապատասխան հետազոտության ենթարկվելու, իսկ որպես թմրամոլ հաշվառված լինելու մասին Ռ. Ղազարյանը տեղեկացել է մեկ տարի անց՝ նոր վարորդական վկայական ստանալու նպատակով ՀՀ Ճանապարհային ոստիկանության համապատասխան ստորաբաժանում դիմելուց հետո:
2015թ. սեպտեմբերի 3-ին տեղի ունեցած նախնական դատական նիստը հետաձգվել էր Դատարանին հայցվորի բնակության հասցեի վերաբերյալ հավելյալ տեղեկություններ տրամադրելու և Տ. Սիրադեղյանի աշխատանքային պայմանագրի բնօրինակը ներկայացնելու նպատակով :