Ոստիկանությունը պահանջում է վարչական պատասխանատվության ենթարկել «Հայ կանանց ճակատի» անդամին
18:27, October 17, 2016 | Մամլո հաղորդագրություններ | Քաղբանտարկյալներ
Տեղեկացնում ենք, որ 2016 թ. հոկտեմբերի 18-ին՝ ժամը 16:00-ին, ՀՀ Վարչական դատարանում տեղի կունենա Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի վարչական շենքի դիմաց Ժ. Սեֆիլյանի նկատմամբ կալանքը որպես խափանման միջոց ընտրելու վերաբերյալ նախաքննական մարմնի միջնորդության քննարկման ժամանակ 2016 թ. հունիսի 22-ին տեղի ունեցած ցույցի մասնակից, «Հայ կանանց ճակատի» անդամ Սուսաննա Սիմոնյանի դեմ ՀՀ Ոստիկանության ներկայացրած հայցադիմումի քննությունը:
Հավաքի ընթացքում ՀՀ Ոստիկանության աշխատակիցների կողմից ֆիզիկական ուժի գործադրմամբ Ս. Սիմոնյանի ձերբակալության ժամանակ վերջինս թքել է ՀՀ Ոստիկանության աշխատակիցների ուղղությամբ, որից հետո Ս. Սիմոնյանը տեղափոխվել է ՀՀ Ոստիկանության Երևան քաղաքի վարչության Քանաքեռ-Զեյթունի բաժին, որտեղ իրականացվել է վարչական վարույթ:
Դատարան ներկայացված հայցով ՀՀ Ոստիկանությունը պահանջում է Ս. Սիմոնյանին պատասխանատվության ենթարկել ՀՀ Վարչական իրավախախտումների վերաբերյալ օրենսգրքի 172.3-րդ հոդվածով, որով վարչական իրավախախտում է համարվում ոստիկանության ծառայողին կամ զինծառայողին վիրավորելը: