Ոստիկանության կարգապահական հանձնաժողովում ընդգրկվելը համակարգի բարեփոխումների վրա ազդելու հնարավորություն կտա. Ա. Սաքունց
17:56, November 19, 2014 | Այլ լրատվամիջոցներ, Նորություններ | Ոստիկանություն
Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցը իր՝ ոստիկանության կարգապահական հանձնաժողովի կազմում կառավարության որոշմամբ ընդգրկվելը համարում է ևս մեկ հնարավորություն ոստիկանության համակարգի բարեփոխումների վրա ազդելու համար: Tert.am-ի հետ զրույցում նման կարծիք հայտնեց իրավապաշտպանը և ընդգծեց, որ Հելսինկյան ասոցիացիայի Վանաձորի գրասենյակը հանձնաժողովում ընդգրկվելու հայտ էր ներկայացրել, դեռ նույն հանձնաժողովի կազմավորման առաջին օրերից:
«Երբ որոշվեց, որ պետք է հասարակական կազմակերպություններ ընդգրկվեն հանձնաժողովի կազմում, մենք անմիջապես դիմեցինք, սակայն այդ ժամանակ մեզ չընդգրկեցին: Հիմա, երբ մեկը հրաժարվել է, մենք հնարավորություն ստացանք ընդգրկվելու:Հանձնաժողովի նիստերին քննարկվելու են ոստիկանության աշխատակիցների ոչ օրինական գործողությունները և ծառայողական տույժի ենթարկելու հարցերը: Մենք հնարավորություն ենք ունենալու ներկայացնել մեր կարծիքը անմիջականորեն, դեմ առ դեմ»,- ասաց նա:
Հարցին, թե արդյոք ունի որոշակի առաջարկություններ, որոնք պատրաստվում է ներկայացնել հանձնաժողովին, պատասխանեց. «Ինձ համար շատ բաներ դեռ հասկանալի չեն, երբ նիստը կլինի ու ես կմասնակցեմ, մեր առաջարկությունները և պահանջները կներկայացնեմ այնտեղ»:
Աղբյուրը՝ www.tert.am