«Անօրինականություն թույլ տված ոստիկանները քրեական պատասխանատվության չեն ենթարկվում». Արայիկ Զալյան
11:30, February 22, 2017 | Այլ լրատվամիջոցներ, Նորություններ
«Ոստիկանության որեւէ աշխատակից իր անօրինական արարքի համար չի պատժվում»,- արձանագրել են ՀՔԱ Վանաձորի գրասենյակում:
Հելսինկյան քաղաքացիական ասամբլեայի Վանաձորի գրասենյակի անցկացրած «Մարդու իրավունքների խախտումների վիճակը ոստիկան-քաղաքացի հարաբերություններում 2016 թ.-ին» թեմայով քննարկման ժամանակ գրասենյակի իրավաբան Արայիկ Զալյանը ներկայացրեց, որ եղել են դեպքեր, երբ անօրինականություն թույլ տված ոստիկանի նկատմամբ կիրառվել է կարգապահական տույժ, բայց իրենք գտնում են՝ դա բավարար չէ:
«Մենք պնդում ենք, որ ոչ թե պետք է լինի կարգապահական տույժ, այլ քրեական պատասխանատվություն: Եղել են դեպքեր, երբ ընդհանրապես որեւէ անձ որեւէ ձեւով պատասխանատվության չի ենթարկվել: Քննությունը կրել է ձեւական բնույթ կամ ոստիկանի նկատմամբ հարուցվել է քրեական գործ, հարցաքննվել են ոստիկանության աշխատակիցներ, հանցագործություն կատարած հավանական անձինք եւ հարցաքննվել են տուժողները: Իսկ վերջում նախաքննական մարմնի կողմից արժանահավատ են համարվել ոստիկանության աշխատակիցների տված ցուցմունքները, անարժանավահատ են համարվել քաղաքացիների տված ցուցմունքները, ինչի արդյունքում քրեական գործերը կարճվել են»,- ասաց Արայիկ Զալյանը՝ շեշտելով, որ իրավապահ մարմինների կողմից արդյունավետ քննություն չի կատարվում:
Ըստ նրա, քիչ չեն դեպքերը, երբ ոստիկանության աշխատակիցների անօրինական գործողությունները ապացուցող կոնկրետ փաստի հիման վրա հաղորդումը ներկայացվել է, քննչական ծառայությունը նշված հաղորդումը վերահասցեագրել է ներքին անվտանգության վարչություն:
«Այս կերպ փորձում են կամ նպատակ ունեն տակտիկա ձեւավորել, որ ընկալվի որպես հետաքննական գործողություն՝ հատուկ քննչական ծառայության համար, բայց դրա իրավասությունը օրենքից դուրս է: Իսկ ի՞նչ պետք է արվի: Նախ` պետք է ՀՔԾ-ն քննի, արձանագրի կարգապահական խնդիրներ, դրա լույսի ներքո ներկայացնի ներքին անվտանգության վարչություն՝ կարգապահականի հարցը լուծելու համար, մինչդեռ մենք դեպքեր ենք ունենում, որ հաղորդումը ներկայացնում ենք, առանց ուսումնասիրելու միանգամից ուղարկում են ներքին անվտանգության վարչություն, գրության մեջ էլ գրվում է՝ եթե հանցակազմի առկայություն լինի, անպայման ուղարկեք մեզ, որ քննենք»,-նկատեց պարոն Զալյանը: Իսկ ոստիկան-քաղաքացի հարաբերություններով դատավճիռների բողոքները ՄԻԵԴ-ում քիչ չեն: Նա հիշեցրեց հայտնի գործերով ՄԻԵԴ-ի արդեն իսկ հրապարակած որոշումներից Գրիշա Վիրաբյանի գործը, որում ներգրավված էր Երեւանի նախկին ոստիկանապետը. «Հետաքրքրական է, որ Մատաղիսի գործով էլ ՄԻԵԴ-ը արձանագրեց կոնվենցիայի երրորդ հոդվածի դատավարական իրավունքի խախտում, այսինքն` չասաց, որ խոշտանգում է եղել, բայց ասաց, որ փաստի վերաբերյալ քննությունը կատարվել է թերություններով, ինչը նույնպես խախտում է տվյալ գործի շրջանակներում: Դիմումատուներն էլ պնդում են, որ իրենց նկատմամբ վատ վերաբերմունքը կիրառել է Արմեն Հակոբյանը, տվյալ քննչական խումբը, իսկ Արմեն Հակոբյանը ի՞նչ պաշտոն է հիմա զբաղեցնում՝ ներքին անվտանգության վարչության պետի պաշտոն: Այսինքն, մի մարդ, որը մի քրեական գործով, այն էլ այդպիսի գործ, որով դատարանը մարդկանց ցմահ ազատազրկեց, հետո արդարացրեց, հիմա այնպիսի պաշտոն է զբաղեցնում, որ ինքը պետք է որոշի՝ ոստիկանին այսինչ արարքի համար կարգապահական տույժ տա՞, թե՞ չտա: Այսինքն, ոստիկանների մեջ ոստիկան է»: Պարոն Զալյանը նաեւ տեղեկացրեց, որ ՀՔԱ Վանաձորի գրասենյակ տարեկան 700 -800 քաղաքացի է դիմում՝ ոտնահարված իրավունքների հարցերով: Եվ դրանց զգալի մասը հենց ոստիկան-քաղաքացի փոխհարաբերություններում խախտված իրավունքների դեպքեր են:
Փուչիկը տրաքեց ԵԿՄ համագումարին. բացահայտվեց Սերժ Սարգսյանի հերթական սուտը
11:03, February 22, 2017 | Այլ լրատվամիջոցներ, ՆորություններՍերժ Սարգսյանը օրերս հանդիպում է ունեցել ՀՀ ԶՈՒ ղեկավար կազմի օպերատիվ հավաքի մասնակիցների հետ և մի շարք ուշագրավ հայտարարություններ է արել:
Անդրադառնալով 2015թ-ին ձեռնարկված սահմանադրական փոփոխություններին, նա նշել է. «Այսպիսով մենք բացառել ենք «համակեցության» պայմաններում Հանրապետության Նախագահի ու վարչապետի անառողջ մրցակցության հնարավորությունը: Կարծում եմ՝ սա շատ կարևոր է… Նոր Սահմանադրությամբ մեր պետությունն անցնում է կառավարման խորհրդարանական ձևի: Հանրապետության վարչապետի լիազորություններն ու հնարավորությունները ազգային անվտանգության և պաշտպանության առումով լինելու են շատ ավելի լայն, քան այն, ինչ կիսանախագահական համակարգի պայմաններում վերապահված է այսօրվա Նախագահին՝ Գերագույն գլխավոր հրամանատարին»:
«Առաջին լրատվական»– ի հետ զրույցում անդրադառնալով հարցին, թե կարող ենք Ս. Սարգսյանի այս հայտարարությունը դիտարկել որպես ինքնախոստովանություն՝ այն առումով, որ 2005-ից հետո երբ փոխվեց Սահմանադրությունը և անցում կատարվեց կիսանախագահական համակարգի, փաստորեն նախագահի և վարչապետի միջև եղել է Ս. Սարգսյանի խոսքով՝ անառողջ մրցակցություն, ՀՔԱ Վանաձորի գրասենյակի ղեկավար իրավապաշտպան Արթուր Սաքունցը նշեց. «Կարող ենք իհարկե դա գնահատել որպես խոստովանություն տիրող իրավիճակի մասին, բայց ինձ այլևս Ս. Սարգսյանի նման ինքնախոստովանական ցուցմունքները չեն հետաքրքրում, ինձ ավելի շատ զարմացնում է այդ մարդու ինքնաբացահայտումը այլ բնագավառներում: Նա զրո պատկերացում ունի, թե ինչ է ժողովրդավարությունը, բացարձակապես անհասու է հասկանալու, թե ինչ է մրցակցությունը, որովհետև շատ բնական է, որ նախագահական կառավարման համակարգի դեպքում լինեն որոշակի մրցակցություններ, անհամաձայնություններ նախագահի և ԱԺ-ի կողմից ձևավորվող մարմնի՝ կառավարության կողմից»:
Ա. Սաքունցի խոսքով՝ Սերժ Սարգսյանը վախենում է մրցակցությունից. «Իր էությամբ, ի դեպ չունենալով համապատասխան կամային և ինտելեկտուալ կարողություններ, փորձում է միահեծան բռնապետի դիրքերից հանդես գալ և կառավարման սահմանադրական կարգը փոխում է զուտ նեղ անձնական խնդիրներ լուծելու համար»:
Մանրամասները՝ տեսանյութում: