Դեյվիդ Այենսոն. «Հայ ոստիկանները դժկամությամբ են ուժի դիմում»
11:16, May 23, 2014 | Այլ լրատվամիջոցներ, Նորություններ
Ոստիկանության գծով միջազգային փորձագետ, բրիտանացի նախկին ոստիկան Դեյվիդ Այենսոնը Ծաղկաձորում մեկնարկած կլոր-սեղանի ժամանակ անդրադարձավ ոստիկանության գործունեությանը զանգվածային անկարգությունների ժամանակ, հասարակական կարգի ապահովմանն ու քաղաքացիների անվտանգության պահպանության արդյունավետության բարձրացման քայլերին:
Ըստ մեր հյուրի, ինքը մի «տարօրինակ» երեւույթ է նկատել, որ զանգվածային անկարգությունների ժամանակ հայ ոստիկանները դժկամությամբ են ուժ գործադրում:«Գուցե չեն վստահում, որ համակարգը կպաշտպանի իրեն, կամ 2008-ից ասել են, որ ուժ չգործադրեն»,-ասաց նա:
Նա ապշած էր նաեւ, երբ բջջային հեռախոսներով, «ոստիկանների քիթը» մտնելով՝ նկարահանումներ են կատարում քաղաքացիները, առանց տարբերանշանների, ու դրանք գցում «Յութուբ»: «Հազարավոր նյութեր կան»,-հավելեց նա, եւ ասաց, թե տգեղ է, միջազգային փորձագետները պետք է խորհրդատվություն տան զանգվածային դառնող նման երեւույթի մասին:Նա տեղեկացրեց, որ շատ երկրներում բնական է դիտվում, երբ ոստիկաններից յուրաքանչյուրն ունի իր տարբերանշանը, իր համազգեստը, եւ նա կարող է նկարահանումներ իրականացնել:
Այն հարցին, թե քաղաքացու եւ ոստիկանի միջեւ եղած տարածությունը որքան պետք է լինի զանգվածային միջոցառումների ժամանակ, մեր հյուրն ասաց, որ հստակ սահման գոյություն չունի: Ինչ վերաբերում է հասարակական կարգի պահպանման ժամանակ լրատվամիջոցներին, Դեյվիդ Այենսոնի կարծիքով, լրագրողը չպետք է ամբոխի մաս կազմի, եւ կատարի այնպիսի գործողություններ, որոնք պատժելի են թե ամբոխի համար, թե հավասարապես իր համար:«Պետք է լրագրողը զգույշ լինի, որպեսզի նրան չներքաշեն պատմության մեջ:Երբ նա դառնում է ամբոխի մաս, նա կրում է նույն պատասխանատվությունը, ինչ ամբոխը»,-նշեց նա:
Հարցերից մեկն այն էր, որ ոստիկանները հասարակական կարգի պահպանության ժամանակ չեն կրում ոստիկանի հագուստ, սադրիչ գործողություններ են կատարում, իսկ հետագայում քրեական գործ է հարուցվում պետության ներկայացուցչի դեմ կատարած ոտնձգությունների համար: Բրիտանացի փորձագետն ասաց, որ կան օպերատիվ աշխատողներ, որոնք չեն կարող պարզապես երեւալ, այնպես, ինչպես հասարակական կարգը պահպանող ոստիկանները: Ի դեպ, Հայաստանում ի տարբերություն Մեծ Բրիտանիայի չկա «Հասարակական կարգի պահպանության մասին» օրենքը, փոխարենը կան կանոններ, որոնք օրենքի ուժ չունեն: Նա անդրադարձավ համայնքային ոստիկանության խնդիրներին:
«Շատ երկրներում «Համայնքային ոստիկանությունն» ընկալվում է որպես միմյանցից փոքր-ինչ տարբերվող գործառույթներ, որոնք դրսեւորվում են տարբեր մոտեցումներ եւ տարբեր գործելաոճի տեսքով: Գործակցության մակարդակը եւ վարչական այն գործառույթների ծավալը, որոնք դրվում են համայնքային ոստիկանության վրա, ի լրումն «համայնքի դերակատարման», զգալիորեն տարբեր են: «ՀՀ ոստիկանության մասին» օրենքով ոստիկանությունը ապահովում է իր գործառույթները, որոնք իրենց լիարժեք արտացոլումն են գտել «Համայնքային ոստիկանության կանոնադրության» մեջ»,-ասում է ոստիկանության գծով միջազգային փորձագետ, բրիտանացի Դեյվիդ Այենսոնը:
Ըստ փորձագետի, համայնքային ոստիկանության գործունեության բնորոշ գծերն են կանոնադրություն, լիազորված եւ առանձնացված խմբերը, տարածքի եւ համայնքի լավ իմացությունը, համայնքի ներգրավումն ու հաղորդակցումը, խնդիրների լուծման համար համագործակցային մոտեցումը՝ քաղաքացիների խնդիրների հանդեպ:
ԵԱՀԿ Երեւանյան գրասենյակի կողմից կազմակերպված այս սեմինարին կքննարկվեն նաեւ զանգվածային լրատվամիջոցներ եւ ոստիկանություն կապն ու փոխհամագործակցությունը: Զեկուցողն է ՀՀ ոստիկանության հասարակայնության հետ կապերի եւ լրատվության վարչության պետ, ոստիկանության գնդապետ Աշոտ Ահարոնյանը:
Աղբյուրը՝ www.aravot.am
Absolutely first rate and cortop-boptemed, gentlemen!