«Չկա փաստ, որ ոստիկանն օրենքով սահմանված որեւէ պահանջ է ներկայացրել Գեղեցիկ Տոնոյանին»
10:50, November 23, 2017 | Այլ լրատվամիջոցներ, Նորություններ
ՀՀ Վարչական դատարանում այսօր տեղի է ունեցել քաղաքացիական ակտիվիստ, «Հայ կանանց ճակատ» ընդդիմադիր նախաձեռնության անդամ Գեղեցիկ Տոնոյանի գործով դատաքննությունը:
Հիշեցնենք, որ ՀՀ Ոստիկանությունը պահանջում է ցուցարարին պատասխանատվության ենթարկել ՀՀ Վարչական իրավախախտումների վերաբերյալ օրենսգրքի 180.1-րդ հոդվածի 11-րդ և 15-րդ կետերի պահանջներով (տուգանք):
Ոստիկանությունը գտնում է, որ Գեղեցիկ Տոնոյանը, երբ 2016թ. մարտի 24-ին մասնակցել է Մաշտոցի պողոտայում ի պաշտպանություն Գեւորգ Սաֆարյանի կազմակերպված հավաքին, խոչընդոտել է վերջինիս բնականոն ընթացքին, այնուհետեւ՝ չի կատարել ոստիկանի՝ հավաքի բնականոն ընթացքը խոչընդոտող գործողությունները դադարեցնելու մասին հնչեցրած պահանջը: Մինչդեռ Տոնոյանի շահերի պաշտպան, ՀՔԱ Վանաձորի գրասենյակի ներկայացուցիչ Տաթեւիկ Սիրադեղյանի խոսքով՝ Տոնոյանը որեւէ իրավախախտում չի կատարել:
Սիրադեղյանն Aravot.am-ի հետ զրույցում տեղեկացրեց, որ այսօրվա նիստում հետազոտվել են իր կողմից որպես ապացույց ներկայացված տեսանյութերը: «Դրանք Մաշտոցի պողոտայի հավաքի ընթացքն են ներկայացնում եւ փաստում են Ոստիկանության գործողությունների ոչ իրավաչափ լինելը: Տեսանյութերում չկա փաստ այն մասին, որ Ոստիկանությունն օրենքով սահմանված որեւէ պահանջ է ներկայացրել Գեղեցիկ Տոնոյանին»,-նշեց փաստաբանը: Նա տեղեկացրեց, որ դատարանի վճիռը կհրապարակվի դեկտեմբերի 13-ին: