Առաջիկայում ևս ՀՀԿ-ից նեղացողներ ու հեռացողներ կլինեն. Արթուր Սաքունց
15:16, January 24, 2017 | Այլ լրատվամիջոցներ, Նորություններ | Ընտրական իրավունք
Իշխանության ներսում այս փուլում տեղի է ունենում ազդեցության ոլորտների վերաբաժանում, և առաջիկայում ևս ՀՀԿ-ից նեղացողներ ու հեռացողներ կլինեն: Lragir.am-ի հետ զրույցում նման դիտարկում արեց իրավապաշտպան Արթուր Սաքունցը՝ անդրադառնալով նախկին վարչապետ, ՀՀԿ փոխնախագահ Հովիկ Աբրահամյանի՝ ՀՀԿ-ից դուրս գալու որոշմանը:
«Գաղտնիք չէ, որ Հովիկ Աբրահամյանը բավական լուրջ ազդեցություն ունեցող թևերից էր, որի միջոցով Սերժ Սարգսյանը բամփեց Ծառուկյանին ու հեռացրեց քաղաքականությունից: Հիմա էլ բամփվածին վերադարձնում է քաղաքական դաշտ, իսկ բամփողին՝ հեռացնում: Բայց հիմնական խնդիրը նրանում է, որ իշխանական կաթսան նեղացել է՝ ռեսուրսների սահմանափակ լինելու պատճառով, և առաջին հերթին, ֆինանսական ռեսուրսների: Դրա ձևակերպումը նաև իշխանության լծակներում է, հանձինս Ազգային ժողովում թվաքանակի անխուսափելի նվազման»,- ասաց նա:
Ըստ Սաքունցի՝ հետևաբար, ստացվել է մի իրավիճակ, որ մարդիկ, ովքեր այլևս ձեռնտու չեն իշխանություններին կամ ներիշխանական հարաբերություններում այլևս օգտագործված են, նրանք դուրս են մնում: Այս իրավիճակից կարելի է ենթադրել, որ, Արթուր Սաքունցի խոսքով, առաջիկայում դարձյալ խմորումներ կլինեն, հաշվի առնելով այն հանգամանքը, որ եթե պատգամավորների թիվը 30-ով կրճատվելու է, ապա դա հաստատ միայն ընդդիմության հաշվին չի լինելու, նաև իշխանական ներակացուցիչների հաշվին է կրճատվելու: Այն, որ ՀՀԿ ներսում առաջիկայում էլի նեղացածներ կլինեն, դա միանշանակ է:
«Թե քանի հոգի կլինեն նրանք՝ 10, թե՞ 20, չգիտեմ, բայց յուրաքանչյուրն էլ իշխանության ներսում բավական լուրջ ազդեցություն ունեցող սյուներ են: Եվ դրա հետևանքով կբաշխվեն նաև նրանց ազդեցության ոլորտները՝ ֆինանսական, տնտեսական»,- ասաց նա:
Միաժամանակ, մեր զրուցակիցը իշխանությունից դուրս եկող ու քաղաքականությամբ զբաղվող գործիչներին, որոնց թվում է նաև նախկին պաշտպանության նախարար Սեյրան Օհանյանը, պալատական ընդդիմություն է որակում, որը չի կարող իրականում դեմ գնալ իշխանությանը:
«Նրանք չեն կարող պալատի սահմաններից դուրս գալ, որովհետև միանգամից մեկ օրվա ընթացքում կդառնան բոմժ»,- հավելեց նա:
Ըստ Սաքունցի՝ ընդդիմադիր գործիչների համար կան հստակ չափանիշներ, դա պետական հանցագործությունների վերաբերյալ ցուցմունքներ տալն ու հաղոդումներով հանդես գալն է: Կլինի՞ դա, կունենա՞ն համապատասխան քաջություն՝ խոստովանելու ու նպաստելու այդ հանցագործությունների բացահայտմանը, ուրեմն կարող են նման գործիչներն ակնկալել հանրության ներողամտությունը: