ՀՔԱՎ-ը՝ ընդդեմ ՀՀ Կառավարության գործով դատավճիռը կհրապարակվի 2016 թ. մայիսի 16-ին
22:39, April 26, 2016 | Նորություններ, Սեփական լրատվություն | Տեղեկատվության եւ խոսքի ազատություն
2016 թ. ապրիլի 26-ին ՀՀ Վարչական դատարանում, նախագահությամբ՝ դատավոր Կ. Ավետիսյանի, տեղի ունեցավ ՀՔԱ Վանաձորի գրասենյակը՝ ընդդեմ ՀՀ Կառավարության՝ տեղեկատվություն տրամադրելուն պարտավորեցնելու պահանջի մասին գործով դատաքննությունը: Հիշեցնենք, որ սույն հայցով ՀՔԱ Վանաձորի գրասենյակը պահանջել է պարտավորեցնել ՀՀ Կառավարությանը՝ տրամադրել 1992-2015թթ. ընթացքում ՀՀ Վարչապետի կողմից զենքով պարգևատրված անձանց քանակը, ինչպես նաև նրանց տվյալներն ըստ տարիների:
Դատական նիստը կայացավ ՀՔԱ Վանաձորի գրասենյակի նախագահ Արթուր Սաքունցի ներկայացուցիչ, Կազմակերպության իրավաբան Արայիկ Զալյանի և ՀՀ Կառավարության ներկայացուցիչ Նարեկ Սիմոնյանի մասնակցությամբ: Վերջինս դատական նիստից առաջ ՀՔԱ Վանաձորի գրասենյակի ներկայացուցչին տրամադրեց 1992-1998 թթ. ընթացքում զենքով պարգևատրված անձանց քանակը, որը կազմում էր 25 անձ:
Դատական նիստի ընթացքում դատավարության մասնակիցները հանդես եկան բացման խոսքով: Հայցվորի ներկայացուցիչ Ա. Զալյանը նշեց, որ Կազմակերպությունը տեղեկատվության հարցմամբ դիմել է ՀՀ վարչապետ Հ. Աբրահամյանին՝ խնդրելով տրամադրել տեղեկատվություն ՀՀ վարչապետի կողմից 1992-2015 թթ. զենքով պարգևատրված անձանց քանակի, հանձնված զենքերի տեսակների մասին՝ միաժամանակ խնդրելով տեղեկատվությունը տրամադրել ըստ առանձին տարիների և անձանց: ՀՀ Կառավարության գրությամբ, սակայն, տրամադրվել է ոչ ամբողջական տեղեկատվություն, այն է՝ 1998-2015 թթ. ընթացքում զենքով պարգևատրված անձանց քանակը, և նշելով, որ զենքով պարգևատրելու վերաբերյալ ՀՀ վարչապետի որոշումներն անհատական իրավական ակտեր են, չեն տրամադրվել նաև զենքով պարգևատրված անձանց տվյալները: Ա. Զալյանը հղում կատարեց ՀՀ Սահմանադրության, Մարդու իրավունքների և հիմնարար ազատությունների պաշտպանության մասին եվրոպական կոնվենցիայի, ինչպես նաև «Տեղեկատվության ազատության մասին» ՀՀ օրենքի դրույթներին՝ նշելով, որ դրանց բովանդակությունից բխում է, որ ՀՀ Կառավարությունը տնօրինում է պահանջված տեղեկատվությունը: Հայցվորի ներկայացուցիչը, հղում կատարելով ԶԼՄ հրապարակումներին, որոնք տեղեկություններ էին պարունակում ՀՀ վարչապետի կողմից կոնկրետ անձանց զենքով պարգևատրելու վերաբերյալ, հիմնավորումներ ներկայացրեց նաև «Վարչարարության հիմունքների և վարչական վարույթի մասին» ՀՀ օրենքի պահանջների խախտումների վերաբերյալ՝ հիմնավորելով, որ միևնույն փաստական հանգամանքների դեպքում վարչական մարմինը պարտավոր էր միակերպ գործել: Որպես հավելում՝ Ա. Զալյանը մեջբերեց նաև «Անձական տվյալների պաշտպանության մասին» ՀՀ օրենքի համապատասխան դրույթը, համաձայն որի՝ անձի անունը, ազգանունը համարվում են հանրամատչելի տեղեկություններ: Այսպիսով, Ա. Զալյանը պահանջեց պարտավորեցնել ՀՀ Կառավարությանը տրամադրել կազմակերպության կողմից պահանջված տեղեկատվությունը, մասնավորապես՝ զենքով պարգևատրված անձանց տվյալներն ըստ առանձին տարիների: Ա. Զալյանը նշեց նաև, որ զենքով պարգևատրումների քանակական տվյալները տրամադրելուն պարտավորեցնելու պահանջ չի ներկայացնում, քանի որ դատական նիստից առաջ այդ տեղեկատվությունը տրամադրվել է հայցվորին:
Բացման խոսքով հանդես եկավ նաև ՀՀ Կառավարության ներկայացուցիչ Ն. Սիմոնյանը: Վերջինս դատարան ներկայացրեց ՀՀ Կառավարության գրությունը, որով հայտնվել էր 1992-1998 թթ. զենքով պարգևատրված անձանց քանակը, ինչպես նաև նշվել էր, որ պահանջված մյուս տեղեկությունները ՀՀ Կառավարությունը չի տնօրինում: Ն. Սիմոնյանը հավելեց, որ զենքի տեսակների մասով տեղեկատվությունը տնօրինում է ՀՀ Ոստիկանությունը և համոզվածություն հայտնեց, որ դիմում ներկայացնելու դեպքում ՀՀ Ոստիկանությունն այդ տեղեկատվությունը կտրամադրի հայցվորին:
Նախագահող դատավոր Կ. Ավետիսյանն այս մասով պարզեց հայցվորի ներկայացուցչի կարծիքը: Վերջինս նշեց, որ Կազմակերպությունը նույնաբովանդակ հարցմամբ դիմել է նաև ՀՀ Ոստիկանության պետ Վ. Գասպարյանին, սակայն պահանջված տեղեկատվությունը չի տրամադրվել:
Ն. Սիմոնյանը, շարունակելով իր բացման խոսքը, նշեց, որ ՀՀ Կառավարությունը գտնում է, որ զենքով պարգևատրված անձանց անունների հրապարակումը կլինի անձանց ՝ անձնական տվյալների գաղտնիության իրավունքի խախտում, ուստի խնդրեց մերժել Կազմակերպության կողմից ներկայացված հայցը:
Բացման խոսքերը լսելուց հետո դատարանն անցավ ապացույցների հետազոտման փուլին:
Կողմերը ամփոփիչ ճառով հանդես գալու ցանկություն չհայտնեցին, ուստի՝ դատարանը գործի քննությունը համարեց ավարտված և որպես սույն գործով վճռի հրապարակման օր նշանակեց 2016 թ. մայիսի 16-ը՝ ժամը 13:12-ը: