0 8000 12 11

2015 թ. մարտի 26-ին ՀՀ Լոռու մարզի ընդհանուր իրավասության դատարանում նախագահությամբ դատավոր Ա. Մկոյանի տեղի ունեցավ անտառապետ Թովմա Մաթևոսյանի սպանության մեջ մեղադրվող Տիգրան Մելիքյանի գործով դատական նիստ:

Ինչպես տեղեկացրել էինք, նախորդ դատական նիստի ժամանակ ներգրավվեց ամբաստանյալի նոր պաշտպան՝ փաստաբան Արա Զաքարյանը, ում դատավոր Ա. Մկոյանը տվեց ընդամենը 2 օր ժամանակ գործի ամբողջ նյութերին ծանոթանալու համար:

Այս դատական նիստը դատավորը սկսեց փաստաբանի համար տարօրինակ հարցով, այն է արդյոք պաշտպանը ծանոթացել է քրեական գործի նյութերին: Փաստաբանը հայտարարեց, որ նա ընդամենը 37 ժամում չի հասցրել ծանոթանալ գործի նյութերին և ցանկանում է հանդես գալ դատավորին ինքնաբացարկ հայտնելու մասին  միջնորդությամբ:

Փաստաբան Արա  Զաքարյանը դատարանի դահլիճում ընթերցեց դատավորին ինքնաբացարկ հայտնելու մասին միջնորդությունը, որում ներկայացված էին մի շարք պնդումներ, ըստ որոնց դատավոր Ա. Մկոյանը չունի մասնագիտական բավարար հմտություններ քրեական գործեր քննելու համար, և հենց այդ պատճառով էլ 2015 թ. ապրիլի 2-ից դատավոր Ա. Մկոյանը այլևս քննելու է միայն քաղաքացիական գրծեր: Ինչպես պնդեց փաստաբանը, դատավոր Ա. Մկոյանը փորձում է այս գործը քննել արագացված կերպով և փորձում է դատավճիռ կայացնել մինչ իր տեղափոխվելը: Արա Զաքարյանը հայտարարեց, որ այս դատարանը նման է արտակարգ դատարանի, որի ստեղծումը ՀՀ Սահմանադրությամբ արգելված է:

Արա Զաքարյանի դիրքորոշումը և դատական նիստի այլ մանրամասներ տեսանյութում

Դատավոր Ա. Մկոյանը միջնորդությունը և միջնորդության վերաբերյալ կողմերի կարծիքները լսելուց հետո հեռացավ խորհրդակցությունների սենյակ՝ միջնորդությունը քննարկելու և որոշում կայացնելու: Դատական նիստը հետաձգվեց 2 ժամով:

2 ժամ անց դատավոր Ա. Մկոյանը հրապարակեց որոշումը, որով մերժեց միջնորդությունը:

Որոշման հրապարակմանը ներկա չգտնվող փաստաբան Արա Զաքարյանի բացակայությունից վրդովված, դատավոր Մկոյանը որոշում կայացրեց գրությամբ դիմել ՀՀ փաստաբանների պալատ և պալատի նախագահից խնդրել ուշադրություն դարձնել փաստաբանի վարքի վրա:

Դատական նիստը հետաձվեց և նշանակվեց այսօր՝ մարտի 27-ին, ժամը 12:00-ին: