0 8000 12 11

25 տարի առաջ հունվարի 28-ին հիմնադրվեց հայոց բանակը, Հայաստանի Հանրապետության՝ որպես ինքնիշխան պետության և նրա քաղաքացիների անվտանգության և պաշտպանության ու տարածքային ամբողջականության ապահովման երաշխավորը:

Անցած քսանհինգ տարիների ընթացքում ՀՀ բանակի կայացմանն ուղղված  բարեփոխումները դեռևս չեն ապահովել զինված ուժերի նկատմամբ իրական ժողովրդավարական, քաղաքացիական վերահսկողության իրականացումը, հատկապես՝ ներքին քաղաքականության բնագավառում զինված ուժերի քաղաքական չեզոքության պահպանումը:

Զինված ուժերում մահացության, կանոնադրական հարաբերությունների խախտման շարունակվող դեպքերի չնվազող թիվը վկայում է զինված ուժերի կառավարումը իրավական պետության սկզբունքներին համապատասխանեցնելուն   խոչընդոտող լրջագույն խնդիրների առկայության մասին:

2016թ. ապրիլյան պատերազմական գործողությունները ևս մեկ անգամ բացահայտեցին զինված ուժերում կոռուպցիայի տարածվածության քայքայիչ ազդեցությունը բանակի մարտունակության վրա, որի հետևանքը հանդիսացավ զոհերի աննախադեպ թիվը:

Սպաները և զինվորները սեփական կյանքի գնով չպետք է փոխհատուցեն տարիներ շարունակ վերը նշված չլուծվող խնդիրների համար:

Հայրենասիրական պրոպագանդայով չպետք է քողարկվի իշխանությունների պատասխանատվությունը զինվորների, սպաների կյանքի, անվտանգության և նրանց ընտանիքների սոցիալական պաշտպանության խնդիրների լուծման բնագավառներում:

Շնորհավորելով ՀՀ քաղաքացիներին, սպաներին, զինվորներին, բոլոր զինծառայողներին ՀՀ Զինված ուժերի կազմավորման 25-ամյակի կապակցությամբ՝մաղթում ենք անվտանգ ծառայություն, խաղաղություն և կամք ու ձգտում՝ Ձեր մարդկային արժանապատվության, սեփական իրավունքների պաշտպանության բնագավառում:

ՀՔԱ Վանաձորի գրասենյակ

28.01.2017