0 8000 12 11

2016 թ. հունիսի 21-ին Սյունիքի մարզի Կապան քաղաքում Բաց հասարակության հիմնադրամներ-Հայաստանի և Սիգրիդ Րոզինգ Թրասթի աջակցությամբ տեղի ունեցավ դասընթաց-քննարկում՝ «Հոգեկան առողջության խնդիրներ ունեցող անձանց իրավունքները և խտրականության կանխարգելումը» թեմայով:

Դասընթացին մասնակցում էին մարզային նյարդահոգեբուժական դիսպանսերի, բժշկական, սոցիալական աջակցման տարածքային կենտրոնների, ոստիկանության, Կապանի հանրային պաշտպանի գրասենյակի, ինչպես նաև Սյունիքի մարզպետարանի և Քաջարանի համայնքապետարանի ներկայացուցիչներ:

ՀՔԱ Վանաձորի գրասենյակի իրավական վերլուծությունների և նախաձեռնությունների համակարգող Անահիտ Չիլինգարյանը և մշտադիտարկման մասնագետ Մարիետա Թեմուրյանը ներկայացրին մարդու իրավունքների պաշտպանության մեխանիզմները, խտրականությունը և դրա տեսակները, հոգեկան առողջության խնդիրներ ունեցող անձանց հիմնախնդիրները:

Գործնական աշխատանքների միջոցով ամրապնդվեցին քննարկված թեմաների շուրջ ձեռք բերած գիտելիքներն ու հմտությունները:

Մասնակիցների գնահատմամբ՝ դրանք կիրառելի են իրենց աշխատանքում, և նման հանդիպումներ անհրաժեշտ է պարբերաբար կազմակերպել:

Հոգեկան առողջության խնդիրներ ունեցող անձանց իրավունքների պաշտպանությունը Հելսինկյան Քաղաքացիական Ասամբլեայի Վանաձորի գրասենյակի գործունեության ուղղություններից մեկն է: Այդ ուղղությամբ Կազմակերպությունն իրականացնում է մշտադիտարկումներ, ներկայացնում օրենսդրական առաջարկություններ, տրամադրում՝ անհրաժեշտ խորհրդատվություն, անցկացնում իրազեկման միջոցառումներ՝ դասընթացներ, քննարկումներ: