Մնում է սպասել հուլիսի 1-ին. կարծիքներ՝ ԵՏՄ անդամակցության մասին
09:48, June 30, 2014 | Այլ լրատվամիջոցներ, Նորություններ | ԵՄ, ԵՏՄ
Հայաստանի՝ Եվրասիական տնտեսական միությանն անդամակցելու վերաբերյալ փաստաթղթի ստորագրման հարցը քաղաքագիտական շրջանում իրարամերժ քննարկումների առիթ է տվել. ոմանք ասում են, թե այն կստորագրվի նշված ժամկետում կամ ամենաուշը մի քանի օր հետաձգումով, իսկ ոմանք էլ՝ թե առհասարակ չի ստորագրվի՝ մի շարք խնդիրներով պայմանավորված:
Tert.am-ի հետ զրույցում քաղաքագետ Սերգեյ Շաքարյանցն, օրինակ, ասաց, թե ինքը ո՛չ Կրեմլի գործակալն է Երևանում, ո՛չ էլ Նախագահ Սերժ Սարգսյանի ներկայացուցիչը, սակայն կարող է ասել, որ այն, ինչը տեսանելի է բոլորի համար Աստանայի ժողովից, այդ նույնը դեռևս ուժի մեջ է, քանի որ բանակցող կողմերը ուրիշ հայտարարություններ չեն արել:
«Հայտարարություններ չեն հնչել ո՛չ մեր իշխանությունների, ո՛չ էլ ԵՏՄ-ի անդամ երկրների կողմից, ու մենք ստիպված պետք է համարենք, որ ամեն ինչ բնական հունի մեջ է շարունակվում, ու այն ժամկետը, որ հայտարարվել էր Աստանայում՝ հուլիսի 1-ին, մեր պատասխանները կստանանք այդ օրը: Մնացել է երկու օր»,- ասաց քաղաքագետը:
Արձագանքելով արևմտամետ քաղաքական գործիչների կողմից հաճախ հնչող տեսակետներին, թե Հայաստանի անդամագրման հարցը հետաձգվում է, քանի որ Ռուսաստանը ցանկանում է, որ Հայաստանի հետ միաժամանակ նաև Ադրբեջանն էլ մաս կազմի ԵՏՄ-ին, Սերգեյ Շաքարյանցն ասաց, թե Ադրբեջանի հարց օրակարգում չկա։
«Ադրբեջանը պաշտոնապես ոչ միայն հրավերք ու առաջարկություն չի ստացել, այլ նաև կտրականապես մերժել է որևէ ձևաչափով իր մասնակցությունը ԵՏՄ-ին: Այնպես որ, արևմտամետները թող գնան իրենց խելքը, ուղեղը թափ տան, իրականությանը մոտիկ բաներ մտածեն ու արտահայտվեն: Ռուսամետներին էլ խորհուրդ կտամ ավելի ռուս չլինել, քան ռուսն ինքն է: Երկուսն էլ թող մնան հայ»,– ասաց նա:
Քաղաքագետի գնահատմամբ՝ ԵՏՄ-ին անդամակցելու ժամկետների հետաձգման հարց այս պահին չկա, քանի որ հստակ ժամկետ է նշված: «Եթե նշված ժամկետում ստորագրում չլինի, այն ժամանակ մենք իրավունք կունենանք ասելու, թե տեսեք, հետաձգվում է, ինչ–որ մի բան այն չէ: Ճիշտ է՝ ժամկետը երկրորդ անգամ է վերանայվում, բայց դեռ օր ունենք»,- նկատեց քաղաքագետը:
Ինչ վերաբերում է Արցախի հարցին, ապա Սերգեյ Շաքարյանցի կարծիքով՝ այն երբեք չի կարող հանդիսանալ ձգձգման պատճառ: «Եթե հիշում եք, Նախագահն իր շուրթերով ասաց, որ մնում է երկու-երեք տեխնիկական հարց: Ես տեսնում եմ, որ ընթացքում որոշակի հարցեր լուծվում են»,-ասաց քաղաքագետը՝ որպես օրինակ նշելով աշխատանքային միգրանտների և անձնագրային ռեժիմի հարցերը:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն էլ արձագանքելով քաղաքագետների պնդումներին, թե ընդամենը օրերի խնդիր է ԵՏՄ-ին անդամակցելու վերաբերյալ փաստաթղթի ստորագրումը, ասաց. «Նման մոտեցում, կարծիք կամ գնահատական հնչեցնողներին ես քաղաքագետ չեմ համարում: Լուրջ քաղաքագետը նման բնույթի վերլուծություն կամ նման կարծիք չէր կարող ունենալ, պետք է խորքային վերլուծություն կատարել»:
Սաքունցի բնորոշմամբ՝ ԵՏՄ-ին Հայաստանի անդամագրումը տեխնիկական բնույթի խնդիրների մակարդակում չի գտնվում, դա շատ ավելի խորքային քաղաքական խնդիրների հետ է կապված և Հայաստանի պարագայում բոլոր որոշումները կայացվում են Կրեմլ-Մինսկ-Աստանա եռյակի շրջանակներում:
«Որոշում կայացնող մարմինն այնտեղ է՝ Կրեմլի գլխավորությամբ: Մյուս կարևոր հանգամանքը՝ Հայաստանի հետ կապված, որը խորը խնդիր է, դա Ադրբեջանի ներգրավմամբ է պայմանավորված: Այսինքն՝ Կրեմլը Աստանայի և Մինսկի միջոցով ցանկանում է, որպեսզի Հայաստանին և Ադրբեջանին միաժամանակ վերցնի Եվրասիական տնտեսական միության մեջ»,– ասաց նա:
Արթուր Սաքունցի խոսքով՝ և հիմա ամբողջ այդ ժամանակի անորոշության կամ ձգձգման հիմքում ընկած է այդ խնդրի լուծումը. ինչպես անել կամ ինչ խոչընդոտներ հաղթահարել, որպեսզի Հայաստանն ու Ադրբեջանը միաժամանակ ընդգրկվեն միության մեջ:
«Իսկ այդ խնդրում հիմնական խոչընդոտ է հանդիսանում Ղարաբաղի վերաբերյալ պայմանավորվածությունների ձեռքբերումը՝ Կրեմլ-Երևան-Բաքու եռյակի շրջանակներում: Դրանով է պայմանավորված նաև Լավրովի դիվանագիտական այցելությունները, Կրեմլում և Երևանում գտնվող վերլուծաբանների գնահատականները»,- համոզմունք հայտնեց իրավապաշտպանը։
Միաժամանակ նա դժվարացավ ասել, թե ինչպիսին կլինեն այդ պայմանավորվածությունները, բայց նշեց, թե դրանք անվտանգության մտահոգությունների տեսակետից որևէ բովանդակային լուծում չեն կարող ունենալ:
Աղբյուրը՝ www.tert.am