Արմավիրցի 4-ամյա Կարինեի մահվան համար դատապարտված բժիշկը ամբողջությամբ ընդունում է մեղքը և պատրաստ է նյութական վնասի փոխհատուցում տրամադրել
18:13, September 7, 2017 | Նորություններ, Սեփական լրատվություն | Կյանքի իրավունք | Կարինե Հովհաննիսյան
2015 թ. «Արմավիր» ԲԿ-ում մահացած 4-ամյա Կարինե Հովհաննիսյանի իրավահաջորդն ու նրա ներկայացուցիչ, ՀՔԱ Վանաձորի գրասենյակի փաստաբան Անի Չատինյանը երեխայի մահվան պատճառ դարձած բժիշկ Ա. Պետրոսյանից նյութական վնասի փոխհատուցում են պահանջում:
Ընդհանուր առմամբ Կարինե Հովհաննիսյանի իրավահաջորդը պահանջում է 2.000.000 ՀՀ դրամի փոխհատուցում:
Հիշեցնենք՝ ոչ պատշաճ բժշկական օգնություն տրամադրելու համար 2016 թվականի հունիսի 2-ին ՀՀ Արմավիրի մարզի ընդհանուր իրավասության դատարանը Ա. Պետրոսյանին դատապարտել է 3 տարի ժամկետով ազատազրկման` որոշակի պաշտոններ զբաղեցնելու իրավունքից զրկելով 1 տարի 6 ամիս ժամկետով:
2017 թ. սեպտեմբերի 5-ին Արմավիրի մարզի ընդհանուր իրավասության դատարանում կայացած դատական նիստի ընթացքում հայցվորի ներկայացուցիչ Անի Չատինյանը ներկայացրեց հայցի հիմքերն ու առարկան:
Պատասխանող Ա. Պետրոսյանը, չնայած, որ այժմ իր պատիժը կրում է բաց ռեժիմով, դատարան չէր ներկայացել:
Ա. Պետրոսյանի ներկայացուցիչը դատարանում հայտարարեց, որ հայցապահանջը ենթակա բավարարման այն ծավալով, որը դատարանը կհամարի ողջամիտ: Այնուհետև ավելացրեց, որ մեղքի առկայության փաստին պատասխանող կողմը չի առարկում:
Հաջորդ դատական նիստը 2017 թ. հոկտեմբերի 26-ին՝ ժամը 16:40-ին է: