Ոստիկանությունից փոխհատուցում պահանջող ցուցարարի հայցի քննությանը Ֆինանսների նախարարությունը երրորդ անձ է ներգրավվել
11:16, March 15, 2018 | Նորություններ, Սեփական լրատվություն | Ազատության և անձնական անձեռնմխելիության իրավունք
2018 թ. մարտի 14-ին ՀՀ Վարչական դատարանում շարունակվեց ցուցարար Տարոն Սիրադեղյանի հայցի քննությունը:
Վերջինս 2014 թ․ հունիսի 23-ին մասնակցել է ՀՀ հանրային ծառայությունները կարգավորող հանձնաժողովի վարչական շենքի մոտ կազմակերպված հավաքին և ենթարկվել վարչական ձերբակալման: ՀՀ Վարչական դատարանի վճռով վարչական պատասխանատվության ենթարկվելուց հետո 2017 թ. փետրվարի 24-ին ՀՀ Վերաքննիչ վարչական դատարանը ոչ իրավաչափ ճանաչեց ցույցի ընթացքում Տարոն Սիրադեղյանի նկատմամբ ոստիկանության իրականացրած գործողությունները և մերժեց վերջինիս պատասխանատվության ենթարկելու՝ ՀՀ Ոստիկանության հայցը:
Ցուցարարն ու նրա ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանը ՀՀ Ոստիկանությունից պահանջում են ոչ իրավաչափ վարչարարության արդյունքում հասցված ոչ գույքային վնասի փոխհատուցում 465.000 ՀՀ դրամի չափով:
Ավելի վաղ ՀՀ ոստիկանապետ Վ. Գասպարյանը մասնակի բավարարել էր Տարոն Սիրադեղյանի՝ 500.000 ՀՀ դրամի չափով փոխհատուցում ստանալու դիմումը և որպես պատճառված վնասի փոխհատուցում տրամադրել էր 35.000 ՀՀ դրամ: Սակայն վերջինս, գտնելով, որ այդ որոշումն անհիմն է և դիմումը պետք է ամբողջությամբ բավարարվեր, մնացած մասով փոխհատուցում ստանալու պահանջով դիմել է դատարան:
Նախորդ դատական նիստի ընթացքում դատարանը հայտարարեց, որ ՀՀ Ֆինանսների նախարարությունը դիմում է ներկայացրել գործով որպես երրորդ անձ ներգրավվելու մասին և այդ հիմքով հետաձգեց դատական նիստը:
Երեկ կայացած դատական նիստի ընթացքում դատարան էին ներկայացել և պատասխանող ՀՀ Ոստիկանության ներկայացուցիչ Նարեկ Սիմոնյանը, և ՀՀ ֆինանսների նախարարության ներկայացուցիչ Մարգարիտա Ղազարյանը։
Հայցվորի ներկայացուցչին լսելուց հետո պատասխանողն առարկեց հայցի դեմ՝ ՀՀ Ոստիկանության՝ 35.000 ՀՀ դրամ փոխհատուցում տրամադրելու որոշումը համարելով հիմնավոր:
Դատարանը պարտավորեցրեց պատասխանողին դատարան ներկայացնել դիմումի հիման վրա իրականացված վարչական վարույթի նյութերը:
Ֆինանսների նախարարության ներկայացուցիչը ևս առարկեց հայցի դեմ և նշեց, որ հայցվորը պետք է ներկայացնի, թե ինչպես է հաշվարկվել փոխհատուցման ենթակա 500.000 ՀՀ դրամը, ինչպես նաև ապացույցներ ներկայացնի ոստիկանների գործողությունների և պատճառված վնասի պատճառահետևանքային կապի մասին:
Հայցվորի ներկայացուցիչ Տաթևիկ Սիրադեղյանը պատասխանեց, որ պահանջը հիմնավորելու պարտականություն հայցվորը չի կրել, իսկ պատճառահետևանքային կապն արդեն իսկ ապացուցված է՝ Ոստիկանության կողմից փոխհատուցման դիմումը թեկուզ մասնակի բավարարելու փաստով:
Այսքանով նախնական դատական նիստն ավարտվեց: Դատաքննության օրվա և ժամի մասին լրացուցիչ կտեղեկացնենք: