0 8000 12 11

Անընդհատ թարմացվում է

Ընտրատարածքներ թիվ 30, 34

ՀՔԱ Վանաձորի գրասենյակը «Իրազեկ Քաղաքացիների Միավորման», Գորիսի մամուլի ակումբի, Մարտունու կանանց համայնքային խորհրդի, Հայաստանի Հելսինկյան կոմիտեի հետ համատեղ դիտորդություն  է իրականացնում թիվ 30 ընտրատարածքի 34 տեղամասերում և  թիվ 34 ընտրատարածքի 46 տեղամասերում:

Այս ընտրություններին բնորոշ են տեղամասերի մոտ կուտակումները, ընտրողներին ուղղորդելը, դիտորդների աշխատանքը խոչընդոտելը:

Գյումրիում և Վանաձորում տեղի ունեցող ՏԻՄ ընտրությունների դիտարկման ընթացքում արձանագրվել են հետևյալ խախտումները.

Կուսակցությունների ներկայացուցիչների կողմից ուղղորդումներ

Վանաձորի 30/58 տեղամասում ՀՀԿ վստահված անձը, ով թաղապետ է և ԲՀԿ կուսակցության վստահված անձը ուղղորդել են ընտրողներին: Հանձնաժողովի նախագահին տեղեկացնելուց հետո վերոնշյալ անձինք հեռացել են:

Գյումրիի թիվ 34/21 տեղամասում Բալասանյան Դաշինքի և Բարգավաճ Հայաստան կուսակցության ներկայացուցիչներ իրենց ձեռքում եղած ցուցակներով ուղղորդել են ընտրողներին:

Բալասանյան դաշինքի ներկայացուցիչները ընտրողներին ուղղորդել են նաև թիվ 34/64 և 34/65 տեղամասերում: Խախտումների մասին ահազանգվել է հանձնաժողովների նախագահներին, վերջին դեպքում ներկայացվել է գրություն ՏԸՀ:

Գյումրիի թիվ 34/13 տեղամասում ՀՅԴ կուսակցության կողմից ներկայացված հանձնաժողովի անդամը հետևում է, թե ովքեր են մասնակցել քվեարկությանը և այդ մասին նշումներ անում իր մոտ:

Նույն գործողությունը կատարել է թիվ 34/22 տեղամասի վստահված անձնանցից մեկը և թիվ 34/06 տեղամասում՝ «Բալասանյան Դաշինքի» ներկայացուցիչը: Բոլոր երեք դեպքերում զգուշացվել է հանձնաժողովների նախագահներին:

Գյումրիի թիվ 34/10 տեղամասում հանձնաժողովի անդամ Խաչատուր Խաչատրյանի մոտ ցուցակներկան:

Թիվ 34/06 տեղամասում ցուցակների հետ կապված անճշտություններ են արձանագրվել, հանձնաժողովի նախագահին զգուշացնելուց հետո անձնագրային բաժնի միջոցով անճշտությունները վերացվել են:

Դիտորդները ահազանգել են, որ թիվ 34/07 տեղամասում ոմն Սիրանուշ Թադևոսյան, ում մոտ ցուցակներ են եղել, կեղծ փաստաթղթերով մուտք է գործել ընտրատեղամասի տարածք: Հանձնաժողովի նախագահի միջամտության արդյունքում նա հեռացվել է տեղամասից:

Ընտրատեղամասերում կողմնակի անձանց ներկայություն

Թիվ 34/56 և 34/16 տեղամասում նույն կուսակցության երկու վստահված անձինք են եղել, ովքեր նաև խոչընդոտել են դիտորդների աշխատանքը: Նույն տեղամսում կուսակցություններից մեկի ներկայացուցիչը փորձել է քարոզչություն իրականացնել: Երկու դեպքում էլ հանձնաժողովի նախագահին հայտնելուց հետո խախտումը վերացվել է:

Խախտումը վերացվել է նաև թիվ 34/48 տեղամասում ավագանու անդամի թեկնածուի ներկայության դեպքում:

Թիվ 34/59 տեղամասում ևս կողմնակի անձինք են եղել:

Թիվ 30/58 տեղամասում ՀՀԿ երկու վստահված անձ ստիպել են իրենց գրանցել, ահազանգելուց հետո խախտումը վերացվել է:

Կուտակումներ, ընտրողների տեղափոխում

Վանաձորի թիվ 30/25 և 30/51 տեղամասի բակում կուտակումներ են նկատվել: Առաջին դեպքում խնդիրը լուծվել է, երկրորդ դեպքում հաղորդում է ներկայացվել՝ պահանջելով սահմանել ուժեղացված օպերատիվ հսկողություն՝ կանխելու և բացահայտելու նման դեպքերը:

Թիվ 34/78 տեղամասում Գյումրիի տուն-ինտերնատի շահառուների քվեարակությունը կազմակերպվել է նրանց տեղափոխող մեքենայի մեջ: Արձագանքման շրջիկ խումբ է ուղարկվել:

Թիվ 34/79 տեղամասում կուսակցության լիազոր ներկայացուցիչը ներկա է եղել տեղամասում: Հանձնաժողովի նախագահին զգուշացվել է, սակայն հարցը չի լուծվել: Արագ արձագանքման խմբեր ուղարկելուց և համապատասխան գրություն ուղարկելուց հետո խնդիրը ժամեր անց  լուծվել է:

Քվեարկության կարգի այլ խախտումներ

Թիվ 30/01 տեղամասում ընտրողներից մեկը քվեարկել է մյուսի փոխարեն:

Թիվ 34/21 տեղամասում «Բալասանյան Դաշինք» գրառմամբ արկղով սնունդ են հանձնել հանձնաժողովի նախագահին, դրա վերաբերյալ գրություն է պատրաստվել:

Թիվ 30/01 տեղամասում ընտրողներից մեկը քվեարկել է մյուսի փոխարեն:

Թիվ 30/16 տեղամասում թյուրիմացություն է առաջացել ծրարի հետ կապված. քվեախցիկից դուրս գալուց հետո ընտրողը հայտարարել է, որ իրեն ծրար չի տրվել:

Թիվ 34/13, 34/22, 34/65 տեղամասերում վստահված անձինք ցուցակներից դուրս են գրում քվեարկությանը մասնակցած անձանց անունները: Միջամտության արդյունքում խախտումները վերացվել են:

Թիվ 30/48 տեղամասում խնդիրներ են առաջացել նաև ծրարների հետ կապված, որի մասին մատյանում գրառում է արվել:

Թիվ 30/47 տեղամասում ջարդվել է լրատվամիջոցի ներկայացուցչի հեռախոսը, որով տեղամասում նկարահանում է իրականացվել:

Ժամը 12:00-ի դրությամբ թիվ 30 ընտրատարածքի՝ մեր կողմից դիտարկվող 34 տեղամասերում Վանաձորի ավագանու ընտրություններին մասնակցելու
իրավունք ունեցող 38032 անձանցից քվեարկությանը մասնակցել են 7056 ընտրող:

Հելսինկյան Քաղաքացիական Ասամբլեայի Վանաձորի գրասենյակ

Գորիսի մամուլի ակումբ

Իրազեկ Քաղաքացիների Միավորում

Հայաստանի Հելսինկյան կոմիտե

Մարտունու կանանց համայնքային խորհուրդ