Ազատվեցին 1 թերթի համար 500 դրամ վճարելուց
00:00, July 29, 2011 | Մամլո հաղորդագրություններ | Արդար դատաքննության իրավունք, Տեղեկատվության եւ խոսքի ազատությունՀՀ վարչական վերաքննիչ դատարանը՝ նախագահող դատավոր Ա.Առաքելյանի գլխավորությամբ, մասնակի բավարարել է «Հելսինկյան Քաղաքացիական Ասամբլեայի Վանաձորի գրասենյակ» հասարակական կազմակերպության բողոքը:
Դատարանն իր վճռով բեկանել է ՀՀ վարչական դատարանի՝ այս տարվա մարտի 24-ի որոշումը եւ կարճել վարչական գործի վարույթը:
ՀՀ վարչական դատարանը մերժել էր «Հելսինկյան Քաղաքացիական Ասամբլեայի Վանաձորի գրասենյակ» իրավապաշտպան կազմակերպության հայցը՝ ընդդեմ Ստեփանավան համայնքի ավագանու կայացրած որոշման:
2009թ. մայիսից Ստեփանավանի բնակիչները քաղաքապետարանից գրավոր տեղեկատվություն ստանալու համար պատճենահանվող որոշումների կրկնօրինակների 1 թերթի համար վճարում էին 500 դրամ:
«Հելսինկյան Քաղաքացիական Ասամբլեայի Վանաձորի գրասենյակ» հ/կ-ն ՀՀ վարչական դատարան էր դիմել Ստեփանավան համայնքի ավագանու ընդունած 06.05.2009 թվականի թիվ 19-Ն իրավաչափ վարչական ակտն անվավեր ճանաչելու պահանջով՝ համարելով, որ այն ոչ իրավաչափ է եւ հակասում է ՀՀ օրենսդրությանը: ՀՀ վարչական դատարանը, սակայն, մերժել էր իրավապաշտպան կազմակերպության հայցադիմումը: ՀՀ վարչական դատարանի որոշումը բեկանելու, այն փոփոխելու, նաեւ վերոնշյալ վարչական ակտն անվավեր ճանաչելու պահանջով իրավապաշտպան կազմակերպությունը դիմել էր ՀՀ վարչական վերաքննիչ դատարան: Կազմակերպության՝ վերաքննիչ բողոքի դեմ պատասխան չէր ներկայացվել, սակայն 2011 թվականի հունիսի 22-ին վերաքննիչ դատարան էր մուտքագրվել ՀՀ Լոռու մարզի Ստեփանավանի քաղաքապետ Սարգիս Ղարաքեշիշյանի գրությունը, որով վերջինս դատարանին տեղեկացրել է, որ Ստեփանավանի ավագանու վիճարկվող որոշումը ավագանու՝ 2011թ. մայիսի 5-ի թիվ 15-Ն որոշմամբ ուժը կորցրած է ճանաչվել:
Վերաքննիչ դատարանն էլ, ելնելով այն հանգամանքից, որ սույն գործով վիճարկվող որոշումը չեղյալ է համարվել, եւ դրա անվավերության պահանջը այլեւս չի կարող քննարկվել, կարճել է վարչական գործի վարույթը: Նոր որոշմամբ համայնքի ավագանին չեղյալ է համարել 2009 թվականի մայիսի 6-ի թիվ 19-Ն վիճարկվող որոշումը, ինչի արդյունքում քաղաքացիները նախկին 500 դրամի փոխարեն այսուհետեւ գրավոր տեղեկատվություն պահանջելիս՝ մինչեւ 10 էջ տպագրված պատճենահանված տեղեկությունը ստանալու են անվճար՝ օրենքով սահմանված կարգով, իսկ 10 էջից ավելի տեղեկություն ստանալու դեպքում գանձվող գումարի չափը չի գերազանցելու տեղեկության տրամադրման ծախսերը:
Այս տարվա երկրորդ եռամսյակում «Տեղեկատվության ազատության» մասին ՀՀ օրենքը խախտելու համար Ստեփանավանի քաղաքապետ Ս. Ղարաքեշիշյանը հայտնվել էր «Ինֆորմացիայի ազատության կենտրոնի» (ԻԱԿ) «սեւ ցուցակում»՝ վերոնշյալ թիվ 19-Ն որոշման պատճառով: «Սեւ ցուցակը» հրապարակելուց 3 օր անց Ստեփանավանի քաղաքապետարանն ուժը կորցրած էր ճանաչել ավագանու թիվ 19-Ն որոշումը:
Աղբյուրը՝ http://aravot.am/am/articles/rights/96247/view
ԱՆՈՒՇ ԲՈՒԼՂԱԴԱՐՅԱՆ
Վանաձոր