0 8000 12 11

Կոտայքի մարզի ընդհանուր իրավասության դատարանում այսօր` հուլիսի 27-ին Վահան Խալաֆյանի սպանության գործով դատավարությունը վերածվել է ծեծկռտուքի:

Այսօրվա դատական նիստում պետք է հանդես գար գործով վկա, Չարենցավանի նախկին ոստիկանապետ Նորայր Հեբոյանը, սակայն նա չէր ներկայացել` նշելով, թե առողջական խնդիրներ ունի: Քանի որ թե տուժող, թե մեղադրող կողմերը միջնորդեցին ապահովել Նորայր Հեբոյանի ներկայությունը դատական նիստին, դատավորը որոշեց կրկին անգամ հրավիրել Նորայր Հեբոյանին, իսկ չներկայանալու դեպքում` բերման ենթարկել: Դատական հաջորդ նիստը նշանակվեց օգոստոսի 18-ին:

Սակայն դատական նիստից հետո, հենց դատարանի դահլիճում վիճաբանություն եւ ծեծկռտուք սկսվեց Խալաֆյանների եւ գործով հիմնական մեղադրվող Աշոտ Հարությունյանի հարազատների միջեւ: Հենց նրան են մեղադրում Խալաֆյանի հարազատները, Վահանին սպանելու մեջ: Սա առաջին դեպքը չէ, որ այս գործով դատավարության ընթացքում մթնոլորտը լարվում է:

Հիշեցնենք, որ ապրիլի 13-ին Վահան Խալաֆյանը բերման է ենթարկվել Չարենցավանի ոստիկանության բաժանմունք` գողության կասկածանքով, սակայն այնտեղից դուրս է բերվել նրա դին: Գործում նշվում , որ ոստիկանները խոշտանգել են նրան եւ Խալաֆյանն ինքնասպան է եղել, այնինչ սպանվածի հարազատները պնդում են, որ Վահանին ուղղակի սպանել են դանակի հարվածներով: Խալաֆյանի սպանության գործով որպես ամբաստանյալ անցնում են 4 ոստիկան` Աշոտ Հարությունյանը, Մորես Հայրապետյանը, Գարիկ Դավթյանը եւ Գագիկ Ղազարյանը:

ԱՂԲՅՈՒՐԸ` http://www.news.am/arm/news/26159.html