ՀԱՅՏԱՐԱՐՈՒԹՅՈՒՆ
00:00, July 5, 2007 | ՀայտարարություններՌԴ-ում Հայաստանի և Ադրբեջանի դեսպանների նախաձեռնությամբ հայ և ադրբեջանցի մտավորականության ներկայացուցիչների այցելությունների կազմակերպումը Հայաստան, Ադրբեջան և Լեռնային Ղարաբաղ, նրանց հանդիպումներն ամենաբարձր մակարդակներում ունեցան խավարում լույսի «հայտնվելու» ազդեցություն, ինչն ամրապնդեց հույսը, որ խաղաղասիրական գործունեությունը իր խորքում ունի դեռևս չօգտագործված մեծ ներուժ:
Առավել կարևոր էր նաև այն, որ մտավորականներն այցելությունն իրականացրեցին ոչ թե երրորդ երկրով, այլ հայ-ադրբեջանական շփման գիծը հատելու ճանապարհով:
Մեր կազմակերպությունը, որը Հելսինկյան Քաղաքացիական Ասամբլեայի ադրբեջանական գործընկերների հետ բազմաթիվ նախաձեռնություններ է իրականացրել հակամարտության մեջ գտնվող հասարակության տարբեր ներկայացուցիչների միջև հանդիպումների կազմակերպման և համագործակցության ձևավորման ուղղությամբ, ողջունում և լիովին աջակցում է հատկապես մտավորականության նախաձեռնությունը, որն իրապես քաղաքացիական խիզախության և մարդասիրության օրինակ է բոլորիս համար:
Մեր լիակատար զորակցությունը հայտնելով հայ և ադրբեջանցի մտավորականների հանդիպումը նախաձեռնողներին և մասնակիցներին՝ ավելի հուսադրված ենք ղարաբաղյան հակամարտությունը խաղաղ ճանապարհով լուծելու հնարավորության մեջ և գտնում ենք, որ քաղաքական ղեկավարության պատասխանատվությունը հակամարտությունը խաղաղ ճանապարհով լուծելու մեջ ավելի է մեծանում նման նախաձեռնությունների և քայլերի միջոցով: