Ռուսական ցինիզմ, խայտառակություն … հայաստանյան արձագանքներ՝ հայ վարորդին կանացի խալաթով դատարան տանելու մասին
08:04, July 16, 2013 | Նորություններ | Արդար դատաքննության իրավունք
Մոսկվայում օրերս տեղի ունեցած խոշոր վթարի պատճառով 18 մարդու կյանք խլած Հրաչյա Հարությունյանի վիճակի հետ կապված Հայաստանի արտգործնախարարությունը համապատասխան քայլեր ձեռնարկում է: Այս մասին Tert.am–ին հայտնեց ԱԳՆ մամուլի խոսնակ Տիգրան Բալայանը և ավելացրեց.«Հավելյալ քայլերի ու զարգացումների մասին հավելյալ կտեղեկացնենք»:
Հիշեցնենք, որ Նոր Մոսկվայում շաբաթ օրը Հրաչյա Հարությունյանի վարած «ԿամԱԶ» մակնիշի բեռնատարը մեծ արագությամբ բախվել էր ավտոբուսին։ Տեսագրության մեջ հստակ երևում է, որ բեռնատարի վարորդը ցանկացել է խուսափել բախումից և կտրուկ շրջադարձ է կատարել, սակայն բախվել է տրանսպորտային միջոցին և երկու մասի բաժանել այն։ Հաղորդվում էր, որ վարորդը ռուսական վարորդական իրավունք չի ունեցել, իսկ բեռնատարը դեռևս գարնանը հանված է եղել հաշվառումից։
Տեսանյութում երևում է, որ 46-ամյա Հրաչյա Հարությունյանը դատարանի դահլիճում նստած է ծաղկավոր կանացի խալաթով և տեսախցիկներից թաքցնում է դեմքը, գրում է Комсомольская правда-ն։
Նշենք, որ վարորդի դուստր Լիլիթ Հարությունյանը ֆեյսբուքյան իր էջում գրառել է.«Վարորդը չի խախտել երթևեկության կանոնները, ինքը մեղավոր չի, որ չի կարողացել տորմուզները չեն աշխատել, բավական է հայավարի ճղճիմ մտածելակերպով մեղադրել ու քննադատել բոլոր այն մարդկանց, ովքեր հալալ քրտինքով աշխատելու նպատակով առանց իրենց կամքի դժբախտ իրավիճակում են հայտնվում ու մի բան էլ ամեն անգամ գրելուց առաջ մտածեք, որ իր փոխարեն կարող էր նաև լիներ մեզանից որևէ մեկը»:
Ինչպես նշել էինք՝ հայ վարորդը Մոսկվա էր մեկնել մահացած որդու շիրմաքարի համար գումար վաստակելու: Այս մասին НТВ-ի թղթակցի հետ զրույցում պատմել է նրա եղբայրը, ում խոսքով՝ Հրաչյա Հարությունյանը ազատամարտիկ է և նախկինում «կոնտուզիա» է տարել: Հրաչի 21-ամյա որդին մահացել էր մեկ տարի առաջ՝ բանակում: 46-ամյա Հրաչյա Հարությունյանն ունի կին, երեխա, թոռ:
Tert.am–ի հետ զրույցում Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը, հայ վարորդի հետ կատարվածը որակելով որպես «խայտառակություն», ասաց.«Կանացի խալաթով, ավելին՝ դեռևս առողջական խնդիրներ ունեցող մարդուն առանց պատշաճ բժշկական օգնություն տրամադրելու դատարանի դահլիճ բերելը հանդիսանում է մարդու արժանապատվությունը նվաստացնող վերաբերմունք»։
Արթուր Սաքունցը հավելեց, որ հայտնի էր, այն, որ Ռուսաստանի Դաշնությունում մարդու իրավունքների նկատմամբ հարգանք չկա:
«Դա երևում է համապատասխան զեկույցներում, և Ռուսաստանն իր քաղաքացիների նկատմամբ նույնպես ունի պատժիչ վերաբերմունք, բայց տվյալ դեպքում խնդրի լուծման հարցն արդեն կապվում է Հայաստանի իշխանությունների հետ, քանի որ վարորդը ՀՀ քաղաքացի է»,– ասաց նա:
«Անկախ նրանից, թե այդ վարորդը հայ կլիներ, եզդի ու ռուս: Եթե ՀՀ քաղաքացի է և նման վերաբերմունքի է արժանացել այլ պետությունում, ապա մեր երկիրը պարտավորություն ունի իր քաղաքացու իրավունքների ու շահերի պաշտպանության ուղղությամբ»,- ավելացրեց իրավապաշտպանը:
Ըստ Արթուր Սաքունցի՝ սա առաջին հերթին ենթադրում է, որ ՀՀ-ն կամ Արտգործնախարարության կամ Արդարադատության նախարարության միջոցով պետք է պահանջներ ներկայացնի ռուսական իշխանություններին, որ ոստիկանությունն ու դատարանն իրավունք չունեն նրան նման վերաբերմունքի արժանացնել: Իրավապաշտպանը գտնում է, որ ՀՀ-ն պետք է վարորդին որակյալ իրավաբանական օգնություն ևս հատկացնի:
Վարորդի հետ կապված պատահարը, մասնավորապես, որ նա դատարան է տեղափոխվել կանացի խալաթով, ակտիվորեն քննարկվում է «Ֆեյսբուք» սոցիալական ցանցում:
Լրագրող Հարություն Հարությունյանը «ռուսական ցինիզմ» վերնագրի ներքո «Ֆեյսբուքի» իր էջում գրել է.«Այն ինչ կատարվում է մեր, իբր ռազմավարական ընկեր համարվող երկրում, ուղղակի զզվանք է առաջացնում: Ո՞նց կարելի է մարդուն այդպես ստորացնել: Եղել է դժբախտ պատահար և դեռ պարզ չէ ինքն է ավելի շատ մեղավո՞ր, թե՞ պատկան մարմինները, որ մինչև հիմա այդ վտանգավոր վայրում, որտեղ ըստ ռուսական աղբյուրների ամեն օր վթար է լինում, ոչ նշաններ են տեղադրել և ոչ էլ լուսացույց կա: Մի բան էլ, որ ինձ մտահոգեց. կարծեմ թե մենք Մոսկվայում դեսպանատուն ունենք, որ պետք է իր ներկայացուցչի միջոցով այս դատավարությանը հետևեր»։
Իսկ բլոգեր Կարեն Քոչարյանն էլ գրառել է.«Նոր կապնվեցի մոտ կանգնած աղբյուրների հետ այստեղ և Մոսկվայում, իրավիճակը այսպիսին է, համայնքը փորձում է հանդիպել և հագուստ ու ծխախոտ փոխանցել վարորդին, դեռևս չի ստացվում, սակայն օրվա երկրորդ կեսին հնարավոր է լինի:
Ռուսները ահավոր ԿԱՏԱՂԱԾ են, վատ իմաստով:
Հիմա ամենակարևորը, որ ԲՈԼՈՐՍ, չթողենք, որ որևէ մեկը մեր քաղաքացուն փորձի ստորացնել կամ նվաստացնել: Մեղավոր ա, թող իրա պատիժը ստանա, բայց մեր երկրի ՔԱՂԱՔԱՑՈՒՆ ՈՐևԷ ՄԵԿԸ ԻՐԱՎՈՒՆՔ ՉՈՒՆԻ ԾԱՂՐԻ ԵՆԹԱՐԿԵԼՈՒ»։
Հիշեցնենք, որ մոսկովյան դատարանի որոշմամբ՝ մինչև սեպտեմբերի 14-ը Հրաչյա Հարությունյանը կալանքի տակ կպահվի։ Փաստաբան Ալեքսանդր Մելցևը վստահ է, որ աշնանն այդ ժամկետը կերկարաձգվի, քանի որ երկու ամսվա ընթացքում, որը կալանքի առավելագույն ժամկետն է, նախաքննությունը չի հասցնի իրականացնել բոլոր անհրաժեշտ գործողությունները։
Աղբյուրը՝ http://www.tert.am/am/news/2013/07/16/arm-driver-incident-comments/
Թեմայի վերաբերյալ այլ հոդված՝ http://www.galatv.am/news/view/saqunc-moscow.html