ՀՀ Գլխավոր դատախազությունը դեռ ստուգում է դատապարտյալներին բավարար սնունդ չտրամադրելու մասին 5 ամիս առաջ հրապարակված տեղեկատվության հիմնավորվածությունը
18:07, September 5, 2017 | Նորություններ
2017 թ. ապրիլի 23-ին Aravot.am լրատվական կայքում հրապարակվել էր «Դատապարտյալներին պարտադրու՞մ են հրաժարվել ճաշարանային սնունդից» վերնագրով նյութ, որում ներկայացված էին կիսաբաց ռեժիմով կալանավայրերից խմբագրություն ստացած ահազանգերը:
Հրապարակման համաձայն՝ կալանավորներին առաջարկել են հրաժարվել ճաշարանային սնունդից, իսկ պատճառն, ըստ ահազանգողների, սննդամթերքի՝ նախատեսված քանակից քիչ լինելն է:
Հանցագործության մասին տեղեկություններ պարունակող այս ահազանգների ուղղությամբ միջոցներ ձեռնարկելու հարցով 2017 ապրիլի 23-ին ՀՔԱ Վանաձորի գրասենյակը դիմել էր ՀՀ Գլխավոր դատախազություն:
Դատախազությունն արձագանքել էր շուրջ մեկ ամիս անց միայն՝ 2017 թ. մայիսի 19-ին և վստահեցրել, որ այդ կապակցությամբ ստուգումներ են անցկացնելու:
ՀՔԱ Վանաձորի գրասենյակը 2017 թ. մայիսի 30-ին երկրորդ գրությունն էր ուղարկել, որում նշել էր, որ հանցագործության մասին հաղորդմանը նման արձագանք տալը դուրս է օրենքի շրջանակներից, և պահանջել էր կայացնել որոշում ՀՀ Քրեական դատավարության օրենսգրքի 181-րդ հոդվածի համաձայն և տրամադրել այն:
Եվս մեկ ամիս անց՝ 2017 թ. հունիսի 6-ին, Դատախազությունն արձագանքել էր այս գրությանը: Ինչպես տեղեկանում ենք պատասխան գրությունից, հերթական անգամ հանցագործության կոնրետ դեպքի նկարագրություն պարունակող լրատվական նյութը Դատախազությունում քրեական գործ հարուցելու հիմք չեն համարել, ավելին՝ պնդել են, որ նյութում առկա տվյալները «վերացական և ընդհանուր բնույթի են», և դրանով իրավաչափ համարել հաղորդման հիման վրա քրեադատավարական բնույթի որոշում չկայացնելը:
Դատախազությունից կրկին հիշեցրել են նաև, որ «….դատապարտյալների բավարար սնունդ ստանալու իրավունքի իրացման ոլորտում կատարվում են համապատասխան ստուգումներ՝ ճշտելու համար նաև վերը նշված հրապարակման մեջ առկա տվյալների հիմնավորվածությունը»:
Թե ինչ գործողություններ են իրականցվել դրանք ստուգելու համար, ինչ արդյունքներ են արձանագրվել ստուգումների արդյունքում և արդյոք որևէ մեկը պատասխանատվության ենթարկվել է, թե՝ ոչ, որևէ տեղեկություն Դատախազությունը մինչ օրս չի հրապարակել:
Այս հարցով երրորդ անգամ ՀՔԱ Վանաձորի գրասենյակը ՀՀ Գլխավոր դատախազություն է դիմել 2017 թ. օգոստոսի 23-ին: Եվ հարցադրումներ է ներկայացրել անցկացված ստուգումների, դրանց արդյունքների ու ձեռնարկված գործողությունների մասին:
ՀՀ Գլխավոր դատախազության պատիժների և հարկադրանքի այլ միջոցների կիրառման օրինականության նկատմամբ հսկողության վարչության պետի տեղակալ, արդարադատության առաջին դասի խորհրդական Ա. Կուբանյանի՝ 2017 թ. օգոստոսի 30-ի պատասխանում ասվում է հետևյալը. «[….] ՀՀ ԱՆ քրեակատարողական հիմնարկներում իրականացվող ստուգումները դատապարտյալներին բավարար սնունդ տրամադրելու ոլորտում դեռևս ընթացքի մեջ են՝ հաշվի առնելով իրականացվող ստուգումների ծավալը»: