0 8000 12 11

2010 թ. սեպտեմբերի 16-ին Թրանսփարենսի ինթերնեշնլ հակակոռուպցիոն կենտրոնում ՀՔԱ Վանաձորի գրասենյակի կողմից իրականացվող «Քաղաքացիական վերահսկողության ձեւավորումը զինված ուժերի նկատմամբ» ծրագրի շրջանակներում տեղի ունեցավ ռազմական բյուջեի մոնիթորինգի մասնակիցների երրորդ աշխատանքային հանդիպումը:

Հանդիպմանը մասնակցում էին ծրագրի աշխատակազմը եւ մոնիթորինգի մասնակիցները, որոնք մարտ ամսին մասնակցել էին բյուջեի մոնիթորինգի դասընթացին եւ իրականացնում են ռազմական բյուջեի մոնիթորինգը:

Հանդիպման նպատակն էր մոնիթորինգի մասնակիցների հետ քննարկել ՀՀ պաշտպանության բյուջեի ուսումնասիրության ուղղությամբ մինչ այժմ կատարված եւ դեռեւս հետագա 5 ամիսների ընթացքում կատարվելիք  աշխատանքները: Մասնակիցները ներկայացրեցին եւ քննարկեցին իրենց կողմից իրականացված վերլուծությունները  ՀՀ զինված ուժերի աշխատակազմի թվաքանակի, աշխատավարձերի, պաշտպանության գնումների եւ պաշտպանության բյուջեի շրջանակներում կատարվող ծախսերի, մասնավորապես՝ ռազմական տեխնիկայի վերաբերյալ:  Քննարկվեց նաեւ ՀՀ պաշտպանության նախարարության հանրային իրազեկման հայեցակարգը, որի բարելավման վերաբերյալ կներկայացվեն առավել կոնկրետ առաջարկներ համապատասխան աշխատանքային խմբի կողմից:  

Առաջարկությունների արդյունքում գրություններ կպատրաստվեն՝ ուղղված ՀՀ պաշտպանության նախարարությանը՝ հետագա վերլուծության ամբողջացման համար ավելի կոնկրետ տեղեկատվություն ստանալու նապատակով:

«Քաղաքացիական վերահսկողություն զինված ուժերի նկատմամբ» ծրագիրն իրականացվում է նիդերլանդական ICCO (Համագործակցության զարգացման միջեկեղեցական կազմակերպություն) կազմակերպության ֆինանսական աջակցությամբ: