Ո՞ւմ հրամաններն է կատարելու ոստիկանության նորաստեղծ «գվարդիան», հանկարծ չդառնա պետության առաջին դեմքին ենթակա ուժային կառույց. Արթուր Սաքունց
14:37, October 4, 2017 | Այլ լրատվամիջոցներ, Նորություններ
Իրավապաշտպան, Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը մտահոգություն է տեսնում ոստիկանության բարեփոխումներով նախատեսված ոստիկանության Ներքին զորքերի`«ոստիկանության գվարդիա» դառնալու հարցում։ Այս մասին Tert.am-ին հայտնեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ ընդգծելով, որ մտահոգիչն այն է, որ «Գվարդիան» հանկարծ չդառնա պետության առաջին դեմքին ենթակա ուժային, ռազմականացված կառույց:
Ներքին զորքերը համարվում է զինվորական ծառայություն և իրապես բանակային ստորաբաժանման բովանդակություն ունի, և ըստ իրավապաշտպանի՝ միանշանակ չպետք է լինի հասարակական կարգի պահպանման մեջ կամ հանրային միջոցառումների ժամանակ ու հասարակական միջոցառումների ընթացքում:
«Բայց մյուս` «գվարդիա» կոչելու հարցի մասով, թե «գվարդիա» ասածն ինչ գործառույթներ է իրականացնելու, եթե սահմանների պաշտպանությանը մասնակցելու է միայն արտակարգ և ռազմական դրության ժամանակ, հարցը հետևյալն է՝ արդյո՞ք միայն ռազմական դրության մասին օրենքով սահմանված կարգով հայտարարելուց հետո պետք է ներգրավվի: Թե՞ արտակարգ իրավիճակների ժամանակ էլ կարող է օգտագործվել: Եվ երկրորդ՝ ո՞վ է լինելու այդ գվարդիայի հրամանատարը: Այսինքն՝ ոստիկանապետի՞ հրամանն է կատարելու, թե՞ մի առանձին հրամանատար է ունենալու, որին նշանակելու է Կառավարությունը: Մենք գիտենք, որ ազգային գվարդիա ստեղծվել է նաև Ռուսաստանում, որն ուղղակի ենթահսկվում է Ռուսաստանի Դաշնության նախագահի կողմից»,– նշեց Սաքունցը:
Այսինքն՝ իրավապաշտպանի հիմնական մտահոգությունն այն է, որ Ռուսաստանի օրինակով Հայաստանում էլ կստեղծվի երկրի առաջին դեմքին ենթակա կառույց, որը ՌԴ-ում, օրինակ, կատարում է Վլադիմիր Պուտինի հրամանները:
Հիշեցնենք, որ ոստիկանության շտաբի պետ, ոստիկանության գնդապետ Հովհաննես Քոչարյանն օրերս վարչապետի հանձնարարականի համաձայն տարեկան գործունեության վերաբերյալ հաշվետվություն ներկայացնելով՝ տեղեկացրեց, որ պատրաստվում են գաղտնազերծել ոստիկանության աշխատակիցների քանակը:
Իրավապաշտպանի խոսքով` Հայաստանում ոստիկանների ընդհանուր թիվը համարվել է ծառայողական գաղտնիք, ինչի պատճառով Արթուր Սաքունցի կենտրոնը (գրասենյակը-ՀՔԱՎ) չի կարողացել գնահատել, թե պետության բյուջեից ոստիկանության աշխատակիցների աշխատավարձերի ֆինանսավորումը որքանով է հիմնավոր:
«Ոստիկանների ընդհանուր թվի մասով հարցը կար, որովհետև, վերջին հաշվով, դա համարվում էր ծառայողական գաղտնիք, և մենք չէինք կարողանում գնահատել, թե պետությունը քանի ոստիկան է պահում և որքանով է դա հիմնավոր:Այսինքն՝ պետբյուջեից ֆինանսավորման արդյունավետության մասին է խոսքը: Սա պետք է արվեր ու եթե ոստիկանությունը սեփական նախաձեռնությամբ է արել, սա, միանշանակ ողջունելի է»: