0 8000 12 11

2016 թ. ապրիլի 13-ին Արմավիրի մարզի ընդհանուր իրավասության դատարանում կայացավ Արմավիր ԲԿ բժշկուհի Ա. Պետրոսյանի գործով հերթական դատական նիստը: Վերջինիս մեղադրանք է  առաջադրվել ՀՀ Քրեական օրենսգրքի  130-րդ հոդվածի 2-րդ մասով (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ):

Հիշեցնենք, որ Դատարանի որոշմամբ ամբաստանյալ Ա. Պետրոսյանի մասնակցությամբ երկու քրեական գործերը քննվում են մեկ վարույթում:

Մանկահասակ Կարինե Հովհաննիսյանի իրավահաջորդների շահերը ներկայացնում է Հելսինկյան քաղաքացիական ասամբլեայի Վանաձորի գրասենյակի իրավաբան Անի Չատինյանը:

Այս դատական նիստին շարունակվեց է. Ամիրխանյանի մահվան գործով դատակոչված վկաների հարցաքննությունը:

Դատակոչված փորձագետ Գ. Հարությունյանը նշեց, որ ամբաստանյալ Ա. Պետրոսյանի կողմից չեն իրականացվել անհրաժեշտ գործողություններ, որոնց արդյունքում հնարավոր կլիներ փրկել հիվանդի կյանքը: Մասնավորապես, նշելով, որ հիվանդանոց ընդունվելիս Կ. Հովհաննիսյանի վիճակը գնահատվել է մոտ ծանրին, որի մասին վկայում են հիվանդության պատմության նկարագրում երեխայի օբյեկտիվ վիճակի մասին եղած տվյալները և նման պայմաններում, երբ հայտնի են եղել երեխայի մոտ հիվանդության զարգացման մասին վերհուշական տվյալները` բազմակի փորլուծություններ, փսխումներ, ջերմության առկայություն, համադրելով վերջիններս երեխայի օբյեկտիվ վիճակի հետ, որոնք վկայել են երեխայի մոտ ջրազրկման հիպովոլեմիկ շոկի մասին, ախտորոշելով նաև նախնական «Սուր աղիքային ինֆեկցիա, գաստրոէնտերոկոլիտ»՝ Կ. Հովհաննիսյանը պետք է հոսպիտալացվեր վերակենդանացման բաժանմունք:

Սակայն, Կ. Հովհաննիսյանը վերակենդանացման բաժանմունք ժամանակին չի տեղափոխվել, հոսպիտալացվել է ինֆեկցիոն բաժանմունքում, որտեղ չեն իրականացվել անհրաժեշտ հետազոտություններ և միջոցառումներ՝ կանխելու համար երեխայի օրգանիզմի ջրազրկումը:

Փորձագետի հարցաքննության ժամանակ, ամբաստանյալը հարցեր էր ուղղում փորձագետին և պատասխանները լսելուց հետո հակադարձելով փորձագետին՝ փորձում էր ամեն գնով արդարացնել իր կողմից իրականացված գործողությունները՝ նշելով որ Կ. Հովհաննիսյանին վերակենդանացման բաժանմունք տեղափոխելու անհրաժեշտություն չի եղել, նրա մոտ շոկային վիճակ չի եղել, իսկ կանխատեսել, որ կարող է շոկային վիճակ զարգանալ, ոչ ոք չէր կարող: Փորձագետը սակայն ևս մեկ անգամ հաստատեց, որ նման վերհուշական տվյալներով երեխան պետք է հոսպիտալացվեր վերակենդանացման բաժանմունքում, ինչը կարող էր կանխել հետագա բարդությունները:

Ինչպես ամբաստանյալը, այնպես էլ Արամավիր ԲԿ-ի այլ բուժաշխատողներ վկայակոչում են ԲԿ-ում բուժում ստացած հիվանդների մեծ թիվը (տարեկան՝ շուրջ 800 հիվանդ)՝ պնդելով, որ նրանց բոլորի բուժումն իրականացվում է նույն մեթոդոլոգիայով, և որևէ բարդություն չի եղել:

Դատական նիստի ընթացքում հարցաքննվեց նաև Է. Ամիրխանյանի մայրը:

Հաջորդ դատական նիստին կհարցաքննվի ամբաստանյալ Ա. Պետրոսյանը և կհետազոտվեն գործում առկա ապացույցները:

Հաջորդ դատական նիստը նշանակված է 2016 թ. ապրիլի 29-ին՝ ժամը 11:30-ին: