0 8000 12 11

2015 թ. հունիսի 25-ին Լոռու մարզի ընդհանուր իրավասության դատարանում, դատավոր Վ. Հովնանյանի նախագահությամբ, տեղի ունեցավ Ավան հոգեկան առողջության կենտրոն ՓԲԸ-ն ընդդեմ Ժուլետա Ամարիկյանի և ՀՔԱ Վանաձորի գրասենյակի գործով դատական նիստը:

Դատական նիստին ներկայացել էին հայցվոր կողմի փաստաբան Էդգար Բադեմյանը, պատասխանող կողմից՝ ՀՔԱ Վանաձորի գրասենյակի ներկայացուցիչ Արայիկ Զալյանը: Դատական նիստին չէր ներկայացել պատասխանող Ժուլետա Ամարիկյանը կամ նրա ներկայացուցիչը:

Դատարանը, հաշվի առնելով, որ Ժուլետա Ամարիկյանը պատշաճ ծանուցվել է դատական նիստի մասին, որոշեց նիստը շարունակել առանց պատասխանող կողմի ներկայության:

Դատավորը դատական նիստի ընթացքում դիմեց հայցվոր կողմին՝ պարզելու հայցի առարկան, քանի որ ըստ վերջինիս հայցի հիմքը հասկանալի էր, իսկ առարկան՝ ոչ: Հայցվոր կողմը բանավոր կերպով հստակեցրեց հայցի առարկան, որը ավելի ուշ դատարանին կուղարկի նաև գրավոր կարգով:

Հայցվորը պահանջեց, որպեսզի ՀՔԱ Վանաձորի գրասենյակը դատարանի վճիռը հրապարակի նույն աղբյուրներով և նույն տպաքանակով, ինչ աղբյուրներով որ հրապարակվել է, ըստ իրենց, զրպարտությունն ու վիրավորանքը Ավան հոգեկան առողջության կենտրոնի հասցեին (հիշեցնենք, որ տվյալ նյութը տեղ էր գտել ՀՔԱ Վանաձորի գրասենյակի «Մարդու իրավունքների վիճակը ՀՀ նյարդահոգեբուժական բուժհաստատություններում 2013թ. Հիվանդանոցը երբեք չի կարող տուն դառնալ… ոչ ոքի համար» զեկույցում):

Դատական նիստի ընթացքում ՀՔԱ Վանաձորի գրասենյակի ներկայացուցիչ Արայիկ Զալյանը ներկայացրեց միջնորդություն՝ որպես պատասխանող կողմ միայն Ժուլետա Ամարիկյանին ներգրավելու համար, քանի որ ՀՔԱ Վանաձորի գրասենյակը տվյալ դեպքում հանդիսանում է ոչ պատշաճ պատասխանող, և կազմակերպության և Ժուլետա Ամարիկյանի դեմ հայցը ներկայացվել է այն վկայությունների հիման վրա, որոնք արվել էին Ժուլետա Ամարիկյանի կողմից: Մինչդեռ դատարանը մերժեց ներկայացված միջնորդությունը:

Դատական նիստի երկու կողմերը ներկայացրեցին միջնորդություններ գործով վկաների ներգրավվելու համար, որոնք ընդունվեցին դատավորի կողմից:

Դատական հաջորդ նիստը նշանակվեց օգոստոսի 21-ին՝ ժամը 12:00-ին: