Դատարանը ոչ իրավաչափ ճանաչեց ցուցարարի նկատմամբ ոստիկանների գործողությունները
18:56, June 7, 2018 | Նորություններ, Սեփական լրատվություն
Այսօր՝ 2018 թ․ հունիսի 7-ին ՀՀ Վարչական դատարանը մերժեց Մաշտոցի պողոտայի ցուցարար Գ. Տոնոյանի դեմ ՀՀ Ոստիկանության հայցն ու մասնակի բավարարեց Գ. Տոնոյանի ու նրա ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տ. Սիրադեղյանի հակընդդեմ հայցը:
Հիշեցնենք՝ ՀՀ Ոստիկանությունը պահանջել էր ցուցարարին պատասխանատվության ենթարկել ՀՀ Վարչական իրավախախտումների վերաբերյալ օրենսգրքի 180.1-րդ հոդվածի 11-րդ և 15-րդ կետերի պահանջներով:
Իսկ Գ. Տոնոյանն ու նրա ներկայացուցիչը պահանջում էին ոչ իրավաչափ ճանաչել ոստիկանների գործողությունները:
Դատարանի դիրքորոշմամբ Գ․ Տոնոյանի՝ Մաշտոցի պողոտայի երթևեկելի գոտում գտնվելը չէր կարող խաթարել հավաքի խաղաղ և բնականոն ընթացքը, հետևաբար, եթե նույնիսկ Ոստիկանությունը ներկայացրել է Մաշտոցի պողոտայի երթևեկելի գոտին ազատելու պահանջ, ապա այն չէր կարող հավաքի խաղաղ և բնականոն ընթացքի ապահովման վերաբերյալ՝ օրենքով սահմանված պահանջ լինել:
Գ. Տոնոյանին ձերբակալելու, ֆիզիկական ուժ գործադրելու գործողությունները, որոնք հանգեցրել են նրա՝ հավաքների ազատության, կարծիքի ազատ արտահայտման, անձնական ազատության և անձեռնմխելիության ու ազատ տեղաշարժի իրավունքների խախտմանը, դատարանը ոչ իրավաչափ ճանաչեց: