Նախաքննական մարմինը խուսափել է
00:00, October 28, 2010 | Նորություններ | Զինծառայողների/Զորակոչիկների իրավունքներ | Զինված ուժեր
Տավուշի մարզի Մեհրաբ զորամասում ըստ պաշտոնական վարկածի ինքնասպանություն գործած պայմանագրային զինծառայող Արտակ Նազարյանի դիակի դատաբժշկական փորձաքննության եզրակացության հրապարակումից հետո փաստաբան Սեդա Սաֆարյանը հրապարակավ հայտարարեց, որ այն «էապես թերի է» և միջնորդել էր գործի քննությունը վարող, ՀԿԳ քննիչ Լ. Պետրոսյանին կրկնակի դատաբժշկական փորձաքննություն նշանակել:
«Նկատի ունենալով, որ դատաբժշկական փորձաքննության եզրակացությունը պարունակում է չհիմնավորված հետևություններ և կասկած է հարուցում, տուժողի իրավահաջորդն անհրաժեշտ է համարում կրկնակի փորձաքննության նշանակումը», սակայն քննիչը մերժել է միջնորդությունը`«անհիմն լինելու հիմքով»:
Հիշեցնենք, որ փաստաբանը նաև բացարկ էր հայտնել փորձաքննությունն անցկացնող փորձագետ Վիգեն Ադամյանին, ինչը ևս մերժվել էր:
Կրկնակի դատաբժշկական փորձաքննություն նշանակելու մասին միջնորդության մեջ Սեդա Սաֆարյանը որպես օբյեկտիվ պատճառներ նշել է իր առարկությունները և պարզաբանման համար առաջադրել փորձագետներին:
Մասնավորապես, փաստաբանն անդրադարձել է հետմահու վնասվածքներին, որի կապակցությամբ փորձագետը եզրակացրել էր, որ «Արտակ Նազարյանի աջ նախաբազկի և ստորին վերջույթներին առկա վերնամաշկից զուրկ տեղերը հետմահու են և հավանաբար առաջացել են տեղափոխման ընթացքում»:
Ըստ Սաֆարյանի, փորձագետը չի պատճառաբանել, թե, հատկապես, վնասվածքների որ հատկանիշներն են բերել հետևության, որ դրանք հետմահու են և հենվելով գործում առկա փաստական տվյալների վրա, հիմնավորել է, որ դիակը տեղափոխվել է պատգարակով, ապա ավտոմեքենայով, հետևաբար այդ ընթացքում նման վնասվածքներ առաջանալ չէին կարող: Նաև` այդ վնասվածքները ինչ առարկաների և ինչ բնույթի ներգործությամբ են պատճառվել:
«Եթե կրկնակի դատաբժշկական փորձաքննությամբ ևս հիմնավորվի, որ այդ վնասվածքներն, իրոք, հետմահու են, ապա տուժողի իրավահաջորդը նախաքննական մարմնին կառաջարկի քննել այն վարկածը, որ Արտակ նազարյանի մահը վրա է հասել այլ վայրում, որն ըստ նախաքննական մարմնի համարվում է դեպքի վայր,- ասում է փաստաբանը,- իսկ նման վարկածի քննության դեպքում պետք է պարզել, թե արդյոք մահվանից առաջ նրան չեն սպանել և ապա քարշ տվել հենակետի գետնատնակից մինչև դիպուկահարի կրակակետը` ինքնասպանության պատկեր ստանալու համար»:
Պահանջելով կրկնակի դատաբժշկական փորձաքննության անցկացման անհրաժեշտությունը, փաստաբանը նախաքննական մարմնի ուշադրությունն է հրավիրել նաև մեկ այլ կարևոր հանգամանքի վրա.
«Հնարավո՞ր է արդյոք, որ կենդանի մարդը բերանի խոռոչում հրազենի փող զգալու դեպքում ոչ թե բնազդաբար հետ քաշի լեզուն, այլ ընդհակառակը, լեզուն առաջ բերի և դրանով ծածկի փողաբերանը ու արձակված գնդակը անցնի լեզվի միջով, թե պարտադիր պետք է բնազդաբար հետ քաշեր լեզուն», հարց է բարձրացրել փաստաբան Սեդա Սաֆարյանը:
Նրա համոզմամբ, փորձագետի կողմից նման հնարավորությունը բացառելու պարագայում կբացառվի ինքնասպանության վարկածը և առաջ կքաշվի մեկ այլ վարկած:
«Որ հրազենի փողը Արտակ Նազարյանի բերանն է մտցվել և կրակոց արձակվել այլ անձի կողմից, երբ նա ծեծի ենթարկվելու հետևանքով արդեն իսկ մահացած կամ մահամերձ ու անգիտակից վիճակում է եղել», հետևություն է արել փաստաբանը:
Փաստաբանն իր միջնորդության մեջ անդրադարձել է նաև Արտակ Նազարյանի հարազատների այն պնդմանը, որ գլխի շրջանում, ականջի հետնամասում գանգոսկրի կոտրվածք է եղել. «Եթե կան, ապա նշել դրանց ուղղվածությունը, առաջացման մեխանիզմը, ծանրության աստիճանը և կարող էին արդյոք հանդիսանալ մահվան պատճառ»:
Փաստաբանը միջնորդել է նաև կատարել դեպքի վայրի լրացուցիչ զննություն, դատաբժշկին տրամադրել նախկինում չտրամադրված մյուս փորձագիտական եզրակացությունները` հագուստների զննության արձանագրությունը, դատահետքաբանական եզրակացությունը, «ինչը էապես կնպաստեր փորձագետի աշխատանքին»:
Մեկ այլ միջնորդությամբ` «հատուկ գիտելիքներ պահանջող հարցերի շուրջ մասնագետի կարծիքը ստանալու անհրաժեշտությունից (որից հետո հնարավոր է, որ իմ կողմից կհարուցվի լրացուցիչ կամ կրկնակի փորձաքննություն նշանակելու և/կամ փորձագետին հարցաքննելու վերաբերյալ միջնորդություն) միջնորդում եմ տրամադրել Ա. Նազարյանի դիակի դատաբժշկական փորձաքննության եզրակացության հավելվածներ հանդիսացող սխեմաների լուսապատճենները և լուսանկարների կրկնօրինակները», հանդես եկել այս գործով երկրորդ փաստաբանը` Մուշեղ Շուշանյանը:
Քննիչ Պետրոսյանը մերժել է նաև այս միջնորդությունը: «Այն փաստը, որ նախաքննության մարմինը խուսափել է տրամադրել մեր հայցած լուսանկարները եւ սխեմաները, եւ դրանով զրկել է մեզ այլընտրանքային մասնագիտական կարծիք ստանալու հնարավորությունից, հիմք է տալիս պնդելու, որ նախաքննության մարմինը լուրջ մտահոգված է պաշտոնականից տարբերվող մասնագիտական կարծիքի ի հայտ գալու հնարավորությամբ», վստահ է փաստաբան Մուշեղ Շուշանյանը:
ԺԱՆՆԱ ԱԼԵՔՍԱՆՅԱՆ
Հ.Գ. ՀՀ ՊՆ քննչական ծառայության պետ Արմեն Հարությունյանը (չշփոթել ՀՀ Մարդու իրավունքի պաշտպանի հետ) հերթապահ մի արտահայտություն ունի` «քննվում է նաեւ սպանության վարկածը»: Սակայն վերը նշված մերժումները ցույց են տալիս, որ իրականում չի կատարվում բազմակողմանի եւ օբյեկտիվ քննություն: