ԳԼԽԱՎՈՐ ԴԱՏԱԽԱԶԸ ՍԵՄՆԵԲԻԻՆ Է ՆԵՐԿԱՅԱՑՐԵԼ ՄԱՐՏԻ 1-Ի ԳՈՐԾԵՐԻ ՎԻՃԱԿԸ
00:00, October 28, 2008 | Նորություններ | Եվրոպայի խորհրդի բանաձևերի և պարտավորությունների կատարում
ՀՀ գլխավոր դատախազ Ա.Հովսեփյանը այսօր ընդունել է Հարավային Կովկասում Եվրամիության հատուկ ներկայացուցիչ Պիտեր Սեմնեբիին:
Հանդիպման ընթացքում կողմերը քննարկել են մարտի 1-2-ին Երեւանում տեղի ունեցած զանգվածային անկարգությունների առթիվ հարուցված քրեական գործի նախաքննության ընթացքին եւ արդյունքներին վերաբերող հարցեր: ՀՀ գլխավոր դատախազն ընդհանուր գծերով ներկայացրել է նախաքննական մարմնի ձեռնարկած քայլերը, արդյունքներն ու դժվարությունները: Տեղեկացրել, որ նախաքննական մարմնի առջեւ խնդիր է դրվել լիարժեք պարզել տեղի ունեցած անկարգությունների մասնակիցների ամբողջ շրջանակըը՝ ինչպես կատարողներին, այնպես էլ դրդողներին, օժանդակողներին եւ նրանցից յուրաքանչյուրի գործողություններին տալ իրավական գնահատական:
Հոկտեմբերի 27-ի դրությամբ դատարան է ուղարկվել 89 քրեական գործ 104 անձի վերաբերյալ: Նախնական կալանքի տակ է գտնվում 7 անձ, որոնց մասով նախաքննությունն ավարտվել է դեռեւս սեպտեմբերի սկզբներին եւ սեպտեմբերի 10-ից նրանց հնարավորություն է տրվել ծանոթանալու քրեական գործի նյութերին: Սակայն մտահոգության տեղիք է տալիս մեղադրյալների կողմից՝ քրեական գործի նյութերին ծանոթանալու համար ողջամիտ ժամկետները խախտելու միտումը. արդեն 47 օր է, ինչ մեղադրյալներն ու նրանց պաշտպանները ծանոթանում են քրեական գործի 41 հատորներին: ՀՀ գլխավոր դատախազը նշել է, որ նրանցից յուրաքանչյուրին մեղադրանք է առաջադրվել քրեորեն հետապնդելի կոնկրետ արարքներ կատարելու համար: «Լիովին ընդունում ենք Եվրոպայի խորհրդի պահանջը` որեւէ մեկը չպետք է պատասխանատվության ենթարկվի իր քաղաքական հայացքների, ելույթների համար եւ մեղադրանքներ են առաջադրվել միայն կոնկրետ գործողություններ կատարելու` անկարգություններին անմիջական մասնակցելու, դրդելու ու օժանդակելու համար»,- ասել է գլխավոր դատախազը, նկատելով, որ քրեորեն հետապնդելի արարքներ կատարելու համար առաջադրված մեղադրանքները մեզանում փորձ է արվում քաղաքականացնել, որովհետեւ անկարգությունները տեղի են ունեցել ոչ թե մարզական կամ մշակութային, այլ քաղաքական ուժի կողմից կազմակերպված հրապարակային միջոցառման ժամանակ:
Հյուրի խնդրանքով անդրադառնալով արձանագրված մահվան 10 դեպքերի քննությանը՝ ՀՀ գլխավոր դատախազը տեղեկացրել է, որ նախաքննությամբ հաջողվել է ճշտել մի շարք հանգամանքներ, սակայն ի հայտ են եկել որոշ խնդիրներ, որոնց պարզաբանման հարցում ակնկալում են միջազգային փորձագետների, փորձագիտական հաստատությունների օգնությունը: Մասնավորապես` փորձագետները որոշակի դժվարություններ ունեն կիրառված հատուկ միջոցների նույնացման հարցում: Ոստիկանների կողմից կիրառված հատուկ միջոցների հետեւանքով ստացած մարմնական վնասվածքներից մահացել է 3 քաղաքացի եւ քննչական մարմինն ունի միջազգային փորձագետների մասնագիտական օգնության կարիքը՝ պարզելու կոնկրետ այն ինքնաձիգը, որից կիրառված հատուկ միջոցը դարձել է կոնկրետ քաղաքացու մահվան պատճառ:
Գլխավոր դատախազը միաժամանակ տեղեկացրել է, որ քննության տվյալներով կիրառված հատուկ միջոցները եղել են ժամկետանց եւ քննության առջեւ խնդիր է դրվել իրավական գնահատական տալ իրավախախտում թույլ տված յուրաքանչյուր անձի գործողություններին:
Նախաքննությամբ պարզվել է նաեւ, որ մահացած մնացած 7 անձանց վնասվածքի բնույթը: Ըստ այդմ` 1-ը կյանքի համար վտանգավոր մարմնական վնասվածքներ է ստացել նռնակի պայթյունից, 1-ը` բութ գործիքից, 5-ը` հրազենից: Ընդ որում, 2 անձի հրազենային վնասվածքները եղել են թափանցիկ, իսկ մյուս երեքի գնդակները հաջողվել է հայտնաբերել եւ առգրավել: Ոստիկանությունից առգրավվել են նաեւ մարտի 1-2-ին՝ նշված տարածք ծառայության ուղարկված ոստիկաններին ամրակցված զենքերի վերաբերյալ մատյանները, զենքերը, որոնք ուղարկվել են փորձաքննության՝ առգրավված գնդակների եւ պարկուճների հետ միասին:
Կողմերը պայմանավորվել են շարունակել շփումներն ու քննարկումները, տեղեկացնում է ՀՀ գլխավոր դատախազության մամուլի ծառայությունը:
ԱՂԲՅՈՒՐԸ՝ http://www.lragir.am/src/index.php#top