0 8000 12 11

ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը իր ֆեյսբուքյան էջում կատարել էր հետևյալ գրառումը. «1998թվականից, ըստ մեր կազմակերպության ուսումնասիրությունների, ՀՀ կառավարության որոշմամբ զինծառայությունից ազատվել են կամ տարկետում են ստացել Առաքելական եկեղեցու 625 սպասավորներ, իսկ զինծառայությունից հրաժարվելու պատճառով ազատազրկման են դատապարտվել միայն 444 եհովայի վկաներ.. իսկ հանրային մակարդակում անընդհատ շեփոհարում են, թե Եհովայի վկաները քայքայում են բանակը, ազգային շահերի դեմ են դուրս գալիս և այլն… թվերը բոլորովի այլ պատկեր են ներկայացնում», որը սուր և կտրուկ արձագանք է ստացել քաղաքական տեխնոլոգ Նարեկ Մալյանի կողմից, իսկ թե ինչով է դա պայմանավորված, Slaq.am –ը փորձեց ճշտել` զրուցելով Նարեկ Մալյանի հետ:

«Սաքունցը փորձել է համեմատել 2 իրար հետ կապ չունեցող թվեր և այդ համեմատության միջոցով փորձել է ստանալ որոշակի վերաբերմունք Հայ Առաքելական Եկեղեցու նկատմամբ, այսինքն, այսպես ասած, հասարակությանը տրամադրել ընդդեմ Հայ Առաքելական Եկեղեցուն»,- այսպես սկսեց պատասխանը Նարեկ Մալյանը, ապա հիմնավորեց,- «թվերը հետևյալն են. Սաքունցը ձեռքի թեթև շարժումով համեմատել է տարկետում ստացած մարդկանց թիվը բանակում ծառայությունից հրաժարված մարդկանց թվի հետ: Ցանկացած տրամաբանող մարդու պարզ և հասկանալի է, որ տարբեր կարգի մարդկանց մասին է խոսքը, համեմատել մարդուն, որը մայիսի փոխարեն, ենթադրենք, սեպտեմբերին է մեկնելու բանակ, այն մարդու հետ, ով հրաժարվում է ծառայել ՀՀ զինված ուժերում, ես կարծում եմ, մեղմ ասած, անտրամաբանական է, և ես տեսնում եմ այդտեղ որոշակի միտում: Չեմ ուզում մտածել, որ Արթուր Սաքունցը տրամաբանությունից լավ չէ, ես ավելի շատ հակված եմ մտածել, որ նա միտումնավոր տարբեր թվեր է համեմատում: Հայտնի անեկդոտի նման, որտեղ 28-ը բաժանում ենք ուրբաթի ստանում ենք 9-ը: Սա շատ նման է ԳՈՒՄ-ի շուկայի դիմաց մատնոցների պտտեցմանը` հասարակական ավելի գլոբալ ձևի մեջ: Մեր այն հարցադրմանը, թե ո՞րն է Սաքունցի նպատակը, արդյո՞ք նա հանդիսանում է Եհովայի վկա կազմակերպության անդամ, Նարեկ Մալյանը առաջ բերեց այն վարկածը, ըստ որի,- «Սաքունցը երիտասարդ տարիներից ատել է Առաքելական Եկեղեցին և շատ սիրել է Եհովայի վկաներին, և ես թույլ չեմ տա մտածել, որ Սաքունցը մի քանի կոպեկ դրամի դիմաց կարող է իրեն թույլ տալ ուղղակի ծիծաղելի մարդու խորամանկություն: Ամբողջ իմաստը հասարակութայն մեջ ձևավորել բացասական վերաբերմունք Հայ Առաքելական Եկեղեցու նկատմամբ: Ինչքանո՞վ է դա բարոյական, ես կթողնեմ հանրության դատին: Ես կսպասեմ, որպեսզի Սաքունցը կոնկրետ ներկայացնի բանակից խուսափած Հայ Առաքելական Եկեղեցու սպասավորների թիվը, կտեսնեմ և այդ ժամանակ նոր կլինի համեմատել: Սաքու՛նց, ազնիվ չի»,- ասաց Նարեկ Մալյանը՝ ուղիղ դիմելով Արթուր Սաքունցին: «Ինձ համար էական չի` ով է խաբում, ո՞վ է փորձում մոլորության մեջ գցել հասարակությանը. ինչ-որ օլիգարխ կամ իրեն իրավապաշտպան ներկայացնող մեկը»,- եզրափակում է Նարեկ Մալյանը:

Աղբյուրը՝ http://www.slaq.am/arm/news/113064/