0 8000 12 11

Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մխիթար Պապոյանի նախագահությամբ այսօր շարունակվեց Հատուկ քննչական ծառայության դեմ Հեղինե Պետրոսյանի եւ նրա ներկայացուցիչներ՝ Հելսինկյան Քաղաքացիական Ասամբլեայի  Վանաձորի գրասենյակի իրավապաշտպաններ Արթուր Սաքունցի եւ Արայիկ Զալյանի բողոքի քննությունը:  ՀՔԾ քննիչ Բաբայանը դատարան էր ներկայացրել  Լեռնային Ղարաբաղի քննչական մեկուսարանում մահացած Հայկ Մովսիսյանի դիակի դատաբժշկական փորձաքննության եզրակացությունը , ինչպես նաեւ կրկնակի դատաբժշկական փորձաքննություն անցկացնելու որոշումը եւ եզրակացության պատճենը: Իրավապաշտպան Արայիկ Զալյանը դատարանին ներկայացրեց բողոքը, հայտնելով, որ զինծառայող Հայկ Մովսիսյանը 2012թ. նոյեմբերի 20-ին դատապարտվել է 3 տարի ազատազրկման, իսկ այս տարվա ապրիլի 11-ին Հայաստանի գլխավոր դատախազի կողմից վերաքննիչ բողոք էր բերվել Սյունիքի մարզի  դատարանի դատավճռի դեմ:

Դատախազի բողոքը բավարարվել էր եւ դատավճռով Հայկ Մովսիսյանը արդարացվել է հանցակազմի բացակայության հիմքով: Իրավապաշտպանը նաեւ տեղեկացրեց, որ քննչական մեկուսարանում Հայկին գտել են մահացած: Այս տարվա մարտի 13-ին գործն ուղարկվել է Հատուկ քննչական ծառայություն, քանի որ նոր քրգործ էր հարուցվել պաշտոնատար անձանց գործողությունների վերաբերյալ:

Բողոքաբեր կողմը  դատարանին հայտնեց, որ Հեղինե Պետրոսյանը՝ Հայկի մայրը չի ճանաչվել տուժողի իրավահաջորդ, իսկ ՀՔԾ քննիչը հունիսի 5-ի որոշմամբ հետաձգել էր տուժողի իրավահաջորդ ճանաչելու պահանջը: Ըստ Հեղինե Պետրոսյանի ներկայացուցիչների՝ պետությունը համոզիչ բացատրություն պետք է ներկայացներ Հայկ Մովսիսյանի մահվան հետ կապված, մինչդեռ, ինչպես հետաքննությունը, այնպես էլ նախաքննությունը հասանելի չի եղել ազատազրկման վայրում մահացած Հայկ Մովսիսյանի ընտանիքի համար:

Ավելին, իրավապաշտպան Արթուր Սաքունցը հայտնեց, որ դիակի կրկնակի փորձաքննության եզրակացության համաձայն՝ Հայկի աջ նախաբազկի վրա եղել է քերծվածք մինչ մահը՝ բութ առարկայով: Իրավապաշտպանը հարցում ուներ, թե մինչ մահանալը արդյոք Հայկը ենթարկվե՞լ է բռնության: Արթուր Սաքունցը հայտնեց, որ երկու դատաբժշկական փորձաքննության եզրակացություն գոյություն ունի մահից 3 օր հետո կայացված եւ որ դա բավարար էր, որ Հայկին ճանաչեին տուժող, իսկ մորը՝ տուժողի  իրավահաջորդ: Բողոքաբեր կողմը հարց է տալիս, թե ինչու է ԼՂՀ քննչական վարչությունը քննություն իրականացրել, մինչդեռ դատավճիռը կայացրել է Հայաստանի Հանրապետության դատարաններից մեկը, բողոքը բերել է Հայաստանի գլխավոր դատախազը եւ որ այս պահին էլ Հայկ Մովսիսյանի իրավահաջորդը հերթական անգամ զրկված է իր իրավունքները պաշտպանելու հնարավորությունից:

Բողոքաբեր կողմը պահանջում է ճանաչել Հեղինե Պետրոսյանին իրավահաջորդ եւ ՀՔԾ քննիչի որոշումը վերացնել: Պատասխանող կողմը՝ ՀՔԾ քննիչը հայտնեց, որ իրենց որոշմամբ Հեղինե Պետրոսյանի պահանջը չի մերժվել, այն հետաձգվել է: Նա ասաց, որ չի հաստատվել ինքնասպանության դրդելու, հասցնելու ապացույց, այլ ԼՂՀ-ում անցկացված քննչական գործողություններով  հիմնավորվել է, որ Հայկը նվաստացման տակ չի կատարել ինքնասպանություն: Դատավոր Մխիթար Պապոյանին հետաքրքրեց Հայկի վերաբերյալ «ԼՂՀ-ի գործի» եւ ՀՔԾ-ի գործերի միացման որոշումը, որոշման հիմնավորվածությունը, նաեւ դատարանը ՀՔԾ-ից պահանջեց այդ որոշումը, որը չէր տրամադրվել դատարանին: Դատական հաջորդ նիստը նշանակվեց վաղը:

Աղբյուրը՝ http://www.aravot.am/2013/07/15/265980/