0 8000 12 11

Հայաստանն արդեն ունի արդարադատության նոր նախարար:

Խոսքը Հովհաննես Մանուկյանի մասին է:

Armlur.am-ը իրավապաշտպան Արթուր Սաքունցից հետաքրքրվեց` ինչ սպասելիքներ ունի նորանշանակ նախարարից, և ինչպես կգնահատի նախկին նախարարի գործունեությունը:

Իրավապաշտպանը դժվարացավ մանրամասն գնահատական տալ Հրայր Թովմասյանի գործունեությունը, ավելին, ինչպես ասում է ժողովրդական ասացվածքը, գնացողի ետևից չեն խոսում, բայց որոշ չլուծված խնդիրների մասին մեր զրուցակիցը բարձրաձայնեց:

Քրեակատարողական հիմնարկների գործունեության մեջ, ըստ Սաքունցի, բարեփոխումներ չեղան, դատապարտյալներին պայմանական վաղաժամկետ ազատ արձակելու առնչությամբ միայն նախագիծ մշակվեց:

«Մյուս կարևոր խնդիրը քրեակատարողական վարչության պետի նշանակման հարցն է: Պաշտոնյան նշանակվում է ՀՀ նախագահի կողմից,  չնայած որ քրեակատարողական վարչությունը արդարադատության համակարգի մի մասն է: Կարելի է այդ հարցը բարձրաձայնել»,- մանրամասնեց մեր զրուցակիցը:

Իրավապաշտպանի խոսքով` նախկին նախարարի ղեկավարման տարիներին նախարարությունը մեծապես շահեց լավ կադրերի հոսքի շնորհիվ. «Փոխնախարարներն ավելի լավն են, քան Հրայր Թովմասյանը: Բավական թարմություն մտցվեց նախարարությունում կադրային հոսքի շնորհիվ: Փոխնախարարները, իրոք, ցանկանում էին փոփոխություն մտցնել արդարադատության ոլորտում, բայց փոխնախարարը չի կարող միայնակ որևէ բարեփոխում անել»:

-Պարո՛ն Սաքունց, արդարադատության նախարարի կարևոր գործառույթը հասարակության մեջ  արդարադատության համակարգի հանդեպ վստահության վերականգնումն է:Կարողացա՞վ դա կյանքի կոչել Հրայր Թովմասյանը:

-Ցավոք սրտի, ո՛չ: Հանրային ընկալման տեսանկյունից՝ Թովմասյանը պետք է, իրավական դաշտի ձևավորման համար լինելով առաջնային նախարարության ղեկավար, կարողանար հանրային վստահություն ներշնչեր ու քայլեր ձեռնարկեր: Բայց դա չեղավ:

-Ի՞նչ սպասելիքներ ունեք նորանշանակ նախարար Հովհաննես Մանուկյանից:

-Ես փոփոխություններ չեմ ակնկալում՝ կլինի դա Հովհաննես Մանուկյանը, թե՝ Հրայր Թովմասյանը, քանի որ քաղաքական համակարգը նույնն է մնացել: Հրայր Թովմասյանը, եթե ցանկանար փոփոխություններ անել, չէր կարող, չէ՞ որ քրեակատարողական վարչության պետը նախագահն է նշանակում:

Աղբյուրը՝ armlur.am