0 8000 12 11

«Վնասվածքները խայտառակ են` գանգուղեղային վնասվածքներ, ծակող-կտրող գործիքով աջ կողմից, երիկամի, ներքին օրգանների վնասվածքներ, աջ ականջի, աչքի վնասվածք…այսինքն, այլանդակ ձեւով ծեծվել է:

Վնասվածքների ծավալը կյանքի հետ անհամատեղելի է եղել»,-Henaran.am-ին ասել է իրավապաշտպան Արթուր Սաքունցը`անդրադառնալով  ԼՂՀ ՊԲ ժամկետային զինծառայող Աղասի Գեղամի Աբրահամյանի մահվան հանգամանքներին:

Հիշեցնենք, որ  օգոստոսի 26-ին զինծառայողն անգիտակից վիճակում տեղափոխվել էր զինվորական հոսպիտալ, որտեղ էլ մահացել էր: Ինչպես արդեն տեղեկացրել է Henaran.am-ը, ՀՀ քրեական օրենսգրքի 112-րդ հոդվածի 2-րդ մասի 14-րդ կետի հատկանիշներով /դիտավորությամբ  առողջությանը ծանր վնաս պատճառելը, որն անզգուշությամբ առաջացրել է  տուժողի մահ/ քրեական գործ է հարուցվել, ձերբակալվածներ դեռեւս չկան:

Իրավապաշտպանը մեզ հետ զրույցում նշեց, որ հարկավոր էր ոչ թե նշված, այլ սպանության հոդվածով գործը հարուցել.«Դա իրապես սպանություն է: Սկզբում հրամանատարը փորձել է  հեքիաթներ տարածել, թե իբր նա էպիլեպսիկ է եղել, ուշագնաց է եղել, տարել են բուժկետ եւ այնտեղ մահճակալից ընկել է, վնասվածքներն էլ դրա հետեւանքով են առաջացել»,- Henaran.am-ին ասաց իրավապաշտպանը, ով անձամբ տեսել է զինվորի դին եւ մահվան վկայականը, որտեղ բազմաթիվ վնասվածքներ են նշված եղել, իսկ մահվան պատճառն «անորոշ» է ձեւակերպվել:

Արթուր Սաքունցը զրուցել է նաեւ զինծառայողի ծնողների հետ: Վերջիններս պատմել են, որ դեպքից 2 օր առաջ Աղասին հեռախոսազրույց է ունեցել մոր, տատի եւ քրոջ հետ: Մայրը իրավապաշտպանին պատմել է, որ որդին անտրամադիր է եղել, թե ինչ խնդիր է ունեցել, առայժմ հայտնի չէ: Աղասի Գեղամի Աբրահամյանը ծառայում էր տխրահռչակ «Եղնիկներ» զորամասում:

Աղբյուրը՝ http://henaran.am/?p=33021