ՀԱԿ-ը, ԲՀԿ-ն եւ ՀՅԴ-ն աջակցություն հայտնեցին Սերժ Սարգսյանին
09:53, December 9, 2014 | Այլ լրատվամիջոցներ, Նորություններ
Ազգային ժողովի կողմից Եվրասիական տնտեսական միությանը միանալու համաձայնագրի վավերացմամբ ունեցանք մի իրավիճակ, երբ Հայաստանի խորհրդարանում ներկայացված քաղաքական ուժերը հրաժարվեցին Հայաստանի նկատմամբ վտագները կանխարգելելու պարտավորությունից:
Այս մասին Lragir.am-ի հետ զրույցում ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ նշելով, որ համաձայնագրին կողմ քվեարկած իրենց ոչ իշխանական համարող ուժերը զրկվեցին բարոյական իրավունքից՝ հանդես գալու հանրության կամ պետության շահերը ներկայացնողի դերում:
«Ես նորմալ գործընթաց եմ սա համարում, որովհետև այսուհետ հստակ գիտենք ում հետ աշխատել, հետագա անելիքները մեզ համար հստակ են դառնում»,- ասաց նա: Սաքունցի խոսքով՝ այս ուժերը պատասխանատվություն են կրում երկրի հետագա իրավիճակի վատթարացման համար: Այն բոլորը ռիսկերը, որոնց մասին խոսվում էր, ահազանգվում էր, այս ուժերն ըստ էության դրանց ուշադրություն չդարձրեցին, հետևաբար սոցիալ-տնտեսական, իրավական և քաղաքական ոլորտներում առաջացող հետագա մարտահարվերների համար ամբողջ պատասխանատվությունը կրելու են համաձայնագրին կողմ քվեարկածները:
«Այդ պատասխանատվությունը կրելու են ոչ միայն զուտ քաղաքական, այլև իրավական տեսանկյունից, որովհետև ես դա այնուամենայնիվ համարում եմ մի գործընթաց, որը չի համապատասխանում ՀՀ Սահմանադրության տարամաբանությանն ու փիլիսոփայությանը: Այն վտանգները, որոնք Հայաստանն ունենալու է՝ պայմանավորված Ռուսաստանի նկատմամբ կիրառվող պատժամիջոցներով, դրա պատասխանատվությունը կրում են հենց այդ ուժերը»,- ընդգծեց նա:
Արթուր Սաքունցի խոսքով՝ սպասելի էր, որ պետք է ԵՏՄ պայմանագիրն Ազգային ժողովի կողմից վավերացվի, քաղաքական կուսակցությունների վերջին շրջանի վարքագիծը դա էր վկայում: Բայց այնուամենայնիվ արտառոց էր, երբ քաղաքական ուժերը, որոնք այսպես կոչված ոչ իշխանական են իրենց համարում, որոնք դեմ էին Սերժ Սարգսյանի վարած քաղաքականությանը՝ հանձինս ՀԱԿ-ի, ԲՀԿ-ի, ՀՅԴ-ի, հրապարակավ իրենց համաձայնությունն ու աջակցությունը հայտնեցին Սերժ Սարգսյանի՝ արտաքին քաղաքականության ոլորտում կայացրած այդ որոշմանը:
«Ըստ էության, դրանով ընդունեցին, որ այնուամենայնիվ ունեն համաձայնություն իրենց կողմից այդպես բուռն քննադատվող Սերժ Սրագսյանի որոշման հետ: Եվ դրանով նաև բացահայտվեց ավելի շատ իրենց ոչ թե ոչ իշխանական, այլ իշխանության մաս լինելու փաստը: Այդ ուժերը փաստացի դադարեցին այլևս լինել որպես ոչ իշխանական: ԵՏՄ-ին անդամագրումը, ինչքան էլ փորձեն ներկայացնել որպեսզ զուտ արտաքին քաղաքականության բնագավառում կայացված որոշում, այնուամենայնիվ այն ուղղակի մեծ ազդեցություն է ունենալու ներքին քաղաքականության հարցերում, մասնավորպես, հարկային,մաքսային քաղաքականության հարցերում: Դրանց հետ կապված օրենսդրության ամբողջ բազան է փոփոխվելու, այսինքն՝ նրանք պետք է քվեարկեն նաև այդ որոշումների օգտին, որոնց վերաբերյալ պետք է առաջարկություններ ներկայացվեն ԱԺ-ում»,- ասաց նա:
Այսինքն, ըստ Սաքունցի, այդ ուժերը ամբողջովին դառնում են ՀՀԿ-ին սերտաճած ուժեր և դառնում են ՀՀԿ-ին կից ինչ-որ գրասենյակներ: Նա ընդգծեց, որ միակ բացառությունը Ժառանգություն խմբակցությունն էր, որի անդամներից ոմանք, անկախ նրանից, որ իրար հետ չեն, օրինակ, Ալեքսանդր Արզումանյանը, Խաչատուր Քոքոբելյանը, բայց հստակ դիրքորոշում հայտնեցին: Այդ դեպքում, նրա խոսքով, ընդհանրապես հարց է ծագում, թե ինչո՞ւ է Ժառանգությունը եռյակի կամ քառյակի հետ նույն հարթակում:
«Ազգային ժողովի յոթ պատգամավորների դեմ քվեարկությունը, այդ յոթ պատգամավորների հայտնած հստակ դիրքորոշումը հույս են տալիս ենթադրելու, որ ամեն ինչ այնքան էլ վատ չէ, ինչքան կարելի էր կարծել: Նման իրավիճակում ԱԺ-ում յոթ պատգամավոր ունենալը, որոնք հստակ դեմ են արտահայտվել, դա խոսում է այն մասին, որ այնուամենայնիվ հասարակության մոտ միանշանակ չէ ԵՏՄ-ին միանալու վերաբերյալ դիրքորոշումը”,- ասաց Արթուր Սաքունցը: