Հրազդանի ընտրություններ. նախնական արդյունքներով` գործող քաղաքապետը հաղթում է իր ընդդիմադիր մրցակցին
14:25, February 13, 2012 | Նորություններ | Ընտրական իրավունքԿիրակի անցկացված Հրազդանի քաղաքապետի ընտրությունների նախնական արդյունքներով` հաղթում է գործող քաղաքապետը:
Հրազդանի 27 ընտրատեղամասերի հաշվարկների համաձայն` 10 տարի քաղաքը ղեկավարող Արամ Դանիելյանը հավաքել է 13.100 ձայն, ի տարբերություն ընդդիմադիր Հայ ազգային կոնգրեսի ներկայացուցիչ, նախկին ազատամարտիկ Սասուն Միքայելյանի, որը, ըստ նախնական տվյալների, հավաքել է 11.500 ձայն:
(Հրազդանի 43.874 ընտրողներից քաղաքապետի ընտրությանը մասնակցել են 25.386-ը կամ ընտրողների շուրջ 58 տոկոսը։)
Սասուն Միքայելյանի նախընտրական շտաբը, ինչպես նաև տարբեր լրատվամիջոցներ տեղեկություններ էին տարածում Հրազդանում ընտրակեղծիքների մասին:
Հրազդանի գործող քաղաքապետ Դանիելյանի շտաբը կամ հերքում էր դրանք, կամ կեղծիքների համար մեղադրում ընդդիմադիր թեկնածուի աջակիցներին:
Արդեն երեկոյան YouTube կայքում տարածվեց Սասուն Միքայելյանի վստահված անձ Գուրգեն Եղիազարյանի և մի կնոջ երկխոսության տեսագրությունն ընտրակաշառքի մասին, որտեղ կինը պնդում էր, որ գումար են բաժանել` 5000 դրամ (շուրջ 13 դոլար), և խնդրում իրեն էլ տալ:
Ավելի ուշ «Ֆեյսբուք» սոցիալական ցանցում տարածվեցին տեսանյութեր Հրազդանում ընտրակաշառք բաժանող «որջի» մասին, տարբեր ընտրատեղամասերում տեղի ունեցող ընտրակեղծիքների նոր տեսագրություններ:
Ընդդիմադիր թեկնածու Սասուն Միքայելյանը, գնահատելով ընտրությունների ընթացքը, հայտարարեց, որ հակառակորդ թիմի ներկայացուցիչները ընտրողներին դրամ են բաժանում։
Մի շարք ընտրատեղամասերում ընդդիմադիր թեկնածուի վստահված անձինք հայտնաբերել էին թանաքոտված կնիքներ, ինչը նշանակում էր, որ ոչ վաղ անցյալում դրանք օգտագործվել էին:
Կոտայքի մարզպետ Կովալենկո Շահգալդյանը, որն աջակցում է Դանիելյանին, հակադարձելով հնչած մեղադրանքներին, ասում է. «Նրանք ՀՀՇ-ի ճանապարհն անցած մարդիկ են, և իրենք են ընտրակեղծիքները սերմանել այս երկրում: Մի մարդ, որ դա արել է, համոզված է, որ դիմացինն էլ կանի: Ես համոզված եմ, բոլորը համոզված են, որ Դանիելյան Արամն ընտրվելու է ձայների ահագին տարբերությամբ: Ի՞նչ իմաստ ունի կեղծիքներ անելը, կեղծիքներ անում են, երբ անճար վիճակում են»:
Գործող քաղաքապետ Արամ Դանիելյանն էլ «Ա1+»-ի հետ հարցազրույցում հայտարարել էր, որ իր հաղթանակը նախագահ Սերժ Սարգսյանի հաղթանակն է: «Ես ՀՀԿ անդամ եմ, իսկ Սերժ Սարգսյանը ՀՀԿ նախագահն է: Մենք պայքարի ենք գնում թիմով, և, բնականաբար, իմ հաղթանակը Սերժ Սարգսյանինն է»,- ասել էր նա:
Փետրվարի 12-ի Հայաստանի մի քանի քաղաքային և գյուղական համայնքներում ՏԻՄ ընտրությունները և, մասնավորապես, Հրազդանինը, հիմնականում դիտարկվել են որպես ստուգարք Հայաստանի քաղաքական ղեկավարության համար` մայիսին կայանալիք խորհրդարանական ընտրություններից առաջ:
Այդուամենայնիվ, մասնավորապես Հրազդանի ընտրությունները, որտեղ մրցակցությունն ավելի սուր էր, քանի որ թեկնածուներից մեկը ընդդիմադիր դաշտից էր, արժանացել է դիտորդական խմբերի և լրատվամիջոցների սևեռուն ուշադրությանը:
Հելսինկյան Քաղաքացիական Ասամբլեայի Վանաձորի գրասենյակը Հրազդանում դիտորդական առաքելություն է իրականացրել ողջ օրվա ընթացքում: Ամբողջական արդյունքները դեռ չեն ամփոփվել, բայց գրասենյակի ղեկավար Արթուր Սաքունցը «ԱրմենիաՆաուին» ասում է, որ օգտագործվել են ֆինանսական ռեսուրսները` ընտրակաշառքների ձևով, հստակ զգացվել է հանձնաժողովի անդամների գերակշիռ մասի կողմնակալությունը դեպի գործող քաղաքապետը:
«Հանձնաժողովի անդամների` ընտրական օրենսգրքի ոչ բավարար իմացությունը դժվարություններ էր առաջացնում: Օգտագործվում էր վարչական ռեսուրսը: Ինձ համար խիստ զարմանալի է, երբ ոստիկանապետը, որը չի ընտրում այդ ընտրատեղամասում, ներս է մտնում և առանձին խոսում տվյալ ընտրատեղամասի հանձնաժողովի նախագահի հետ»,- ասում է Սաքունցը:
Ոստիկանության հանրային կապերի և լրատվության վարչությունը հաղորդագրություն է տարածել, որ ընտրություննների ժամանակ լուրջ միջադեպեր չեն գրանցվել, բացի Հրազդանում արձանագրված երկու դեպքից:
Կենտրոնական ընտրական հանձնաժողովը ընտրությունների վերջնական արդյունքները կհրապարակի երկուշաբթի` մինչև ժամը 14:00-ը:
Սասուն Միքայելյանի ներկայացուցիչն ասել է, որ իրենք համաձայն չեն ընտրությունների նախնական արդյունքներին`հավելելով, որ վերահաշվարկի դիմում չեն ներկայացնի, քանի որ դա անիմաստ են համարում։