Փաշինյանի վերաքննիչ բողոքի դատական նիստի «բյուրոկրատական խնդիրը» հարթվեց, նիստը` ընդմիջվեց /լրացված/
00:00, February 14, 2011 | Նորություններ | Արդար դատաքննության իրավունք | Քաղբանտարկյալներ, Քրեակատարողական հիմնարկներ
«Արթիկ» ՔԿՀ-ում շուտով կվերսկսվի Հայկական ժամանակ օրաթերթի գլխավոր խմբագիր Նիկոլ Փաշինյանի վերաքննիչ բողոքի քննությունը:
Նիկոլ Փաշինյանը պահանջում է վերանայել Արագածոտնի մարզի ընդհանուր իրավասության դատարանի նախագահ Սուրեն Մնոյանի կայացրած որոշումը` կապված իր անազատության ժամկետի հաշվարկի հետ:
Ինչպես Henaran.am-ին փոխանցեց «Արթիկ» ՔԿՀ-ում գտնվող իրավապաշտպան, ՔԿՀ-ներում մոնիտորինգ իրականացնող դիտորդական խմբի ղեկավար Արթուր Սաքունցը` Նիկոլ Փաշինյանը դատարանին միջնորդել է ընդմիջում նշանակել` իրեն անհրաժեշտ փաստաթղթերը խցից վերցնելու համար, որոնք իրեն թույլ չեն տվել վերցնել:
Դատարանը բավարարել է միջնորդությունը: Փաշինյանի փաստաբան Վահե Գրիգորյանն էլ 20 րոպե ժամանակ է խնդրել` պաշտպանյալի հետ խորհրդակցելու համար: Արթուր Սաքունցի խոսքով, դատական նիստի մեկնարկին «բյուրոկրատական խնդիր» է ծագել:
Դատապարտյալի փաստաբաններին ու կնոջը թույլատրվել է մտնել դատական նիստերի դահլիճ, իսկ նիստին ներկա գտնվող լրագրողների մի մասի համար խոչընդոտ է ստեղծվել, թե նրանք նախապես գրանցված չեն: Խնդիրը լուծվել է եւ նիստին ներկա գտնվել ցանկացողները մտել են դահլիճ:
Երկարատեւ ընդմիջումից հետո դատական նիստը վերսկսվել է: Ինչպես Henaran.am-ին տեղեկացնում է իրավապաշտպան Արթուր Սաքունցը, ողջ օրը ծախսվել է այն բանի վրա, որ խցից համապատասխան փաստաթղթերը բերվեն եւ հանձնվեն փաստաբաններին:
«Փորձ էր արվում ՔԿՀ հիմնարկի ներկայացուցչի կողմից բանավեճի առարկա դարձնել այն հարցը, որ նամակների մի մասը պաշտպանությանը չեն վերաբերվում, բայց որուէ խելամիըտ հիմնավորում դա չէր կարող ունենալ»,-նշեց Արթուր Սաքունցը` հավելելով, որ պաշտպանական կողմն ինքն է որոշում, թե որ նյութերը պետք է օգտագործի: Դատարանը երկրորդ անգամ վերահաստատել է Փաշինյանին փաստաթղթերից օգտվելու հնարավորություն տալու իր որոշումը:
Դատական նիստը կրկին հետաձգվել է` այս անգամ փաստաբանների ձեռքի տակ եղած նոր նյութերին ծանոթանալու եւ ԵԴ պատասխանին ծանոթանալու հիմնավորմամբ: Ամենայն հավանականությամբ հաջորդ դատական նիստը տեղի կունենա այս շաբաթվա ընթացքում:
Աղբյուրը՝ http://henaran.am/full_news.php?id=8968