Լյովա Երանոսյանը եւ Աշոտ Կարապետյանը ժամանակին պետք է ենթարկվեին քրեական պատասխանատվության. Արթուր Սաքունց
14:50, August 4, 2016 | Այլ լրատվամիջոցներ, Նորություններ
Հելսինկյան Քաղաքացիական Ասամբլեայի Վանաձորի գրասենյակը փաստահավաք առաքելության շրջանակներում հավաքագրում է տեղեկություններ՝ 2016թ. հուլիսի 17-31-ը եւ դրան հաջորդած ժամանակահատվածում տեղի ունեցած ոստիկանական ապօրինությունների վերաբերյալ, ինչպես նաեւ՝ դրանցից տուժածների եւ վկաների պատմություններ։
Իրավապաշտպան, Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը Hraparak.am-ի հետ զրույցում ասաց, որ այս պահի դրությամբ երեք քաղաքացի է դիմել գրասենյակ։ «Մեզ պետք է բռնությունների, ապօրինությունների ընդհանուր պատկերը։ Միանշանակ պետք է կազմենք զեկույց, որովհետեւ այդ ժամանակահատվածում, մեր գնահատականներով, բերման է ենթարկվել 635-ից ավելի ՀՀ քաղաքացի։ Պաշտոնական տվյալներով՝ 357 քաղաքացի է բերման ենթարկվել, իսկ մեր տեղեկություններով՝ 635-ից ավելի։ Զեկույցում կներառենք ոստիկանության գործողությունների մասին տվյալներ, որոնք կներկայացնենք միջազգային կառույցներին։ Նպատակը իրավապահ համակարգի գործունեությունը ներկայացնելն է»,-ասաց մեր զրուցակիցը։
Ինչ վերաբերում է հուլիսի 17-31-ը Երեւանում տեղի ունեցած դեպքերի առնչությամբ միջազգային կառույցների հնչեցրած գնահատականներին, ապա Արթուր Սաքունցը հիշեցնում է, որ Եվրամիությունը կոչ արեց ոստիկանությանը գործել օրենքի շրջանակներում։ «Այսինքն՝ ամրագրվեց, որ ոստիկանությունը թույլ է տալիս ապօրինություններ»,-ասաց Արթուր Սաքունցը։ Նա հիշեցնում է, որ ՄԱԿ-ի գրասենյակը եւս կոչ է արել, որ ոստիկանությունը մնա օրենքի եւ իրավունքի պահպանման շրջանակներում։ Ինչ վերաբերում է ԵԱՀԿ երեւանյան գրասենյակի արձագանքին, այն, ըստ մեր զրուցակցի, թույլ էր։ Նա հիշեցնում է, որ տեղի ունեցած իրադարձություններին մի քանի անգամ անդրադարձան ՀՀ-ում ԱՄՆ դեսպանատունն ու դեպարտամենտը, արձագանքել է «Human Rights Wastch» կազմակերպությունը։ Արթուր Սաքունցի համար ցավալի է, որ արձագանք չի եղել Եվրախորհրդի հայաստանյան գրասենյակի կողմից։
Արթուր Սաքունցի հետ զրույցի ժամանակ նկատեցինք, որ, սկսած 2008թ. հետընտրական իրադարձություններից, ընդդիմադիր գործունեություն իրականացնող ՀՀ քաղաքացիների նկատմամբ հիմնականում քրեական գործ են հարուցում ՀՀ քրեական օրենսգրքի 316 (Իշխանության ներկայացուցչի նկատմամբ բռնություն գործադրելը) եւ 225 (Զանգվածային անկարգություններ կազմակերպելը) հոդվածներով։
Իրավապաշտպանն արձագանքեց, որ հուլիսի 17-31-ը ընկած ժամանակահատվածում տեղի ունեցող իրադարձությունների հետ կապված ՀՀ քաղաքացիների նկատմամբ քրեական գործ են հարուցում ՀՀ քրեական օրենսգրքի 316 հոդվածի 2-րդ մասով եւ 225 հոդվածով, իսկ «Սասնա ծռեր» ջոկատի անդամների նկատմամբ ՀՀ քր․ օր-ի 219 (Շենքեր, շինություններ, տրանսպորտի, հաղորդակցության եւ կապի միջոցներ զավթելը) եւ 235 (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ իրացնելը) հոդվածներով։«Այդ երկու հոդվածները՝ ՀՀ քրեական օրենսգրքի 316 եւ 225 հոդվածները, հիմք են ծառայում քաղաքական հետապնդման համար»,- ասաց մեր զրուցակիցը։
Արթուր Սաքունցը հիշեցնում է, որ ոստիկանության համակարգում բարեփոխումների համար մեծ չափի ներդրումներ են կատարվել, սակայն այդ ամենը չաշխատեց։ Փոխարենը, ըստ նրա, հուլիսի 17-31-ը ընկած ժամանակահատվածում երեւաց, որ ոստիկանության պահվածքն ամենեւին էլ բարեփոխված ոստիկանության պահվածք չէ։ «Ոստիկանության բարձրաստիճան պաշտոնյաները, որոնք պետք է կրեին պատասխանատվություն, մեկ օր անգամ չպետք է մնային այդ համակարգում, նրանց ներկայությունը ոչ միայն իրական բարեփոխումների համար խոչընդոտ է, այլեւ՝ այդ բարեփոխումները ի չիք է դարձնում։ Հիմա մենք, ելնելով այդ տվյալներից, պետք է ներկայացնենք պահանջ, որ այսպես շարունակել չի կարելի։ Մարդիկ, որոնք պատասխանատու են, մասնավորապես՝ Լյովա Երանոսյանը, Աշոտ Կարապետյանը դեռ «Էլեկտրիկ-Երեւան»-ի ժամանակ էին հանդես եկել նույնատիպ հանցագործ վարքագծով քաղաքացիների նկատմամբ, ժամանակին պետք է ենթարկվեին քրեական պատասխանատվության եւ հեռացվեին համակարգից։ Երբ դա չի արվում, բարեփոխումների մասին խոսելը դառնում է ավելորդ»,- ասաց մեր զրուցակիցը։