Գլխավոր դատախազությունը խուսափում է պատասխանել Սերժ Սարգսյանին հարցաքննության կանչելու դիմումին. Սաքունց
18:25, March 7, 2016 | Այլ լրատվամիջոցներ, Նորություններ | ՀՀ Գլխավոր դատախազություն
«Հանրապետություն» կուսակցության առաջնորդ Արամ Զավենի Սարգսյանի կողմից արված հայտարարության վերաբերյալ Սերժ Սարգսյանին հարցաքննության կանչելու` ՀՔԱ Վանաձորի գրասենյակի ղեկավար Արթուր Սաքունցի դիմումին Գլխավոր դատախազությունը դեռևս չի պատասխանել: Այս մասին MAMUL.am-ի թղթակցին հայտնեց Արթուր Սաքունցը. «Ժամկետը լրացել է: Իրենք 10 օրվա ընթացքում ստանալուց հետո պետք է պատասխանեին: Փետրվարի 14-ին ուղարկել ենք, առավելագույնը մարտի 1-ին, 2-ին պետք է ստանայինք: Ի դեպ, արդեն օրինաչափություն է, երբ նման նշանակություն ունեցող, այսպես ասած` իշխանության համար անհարմար հարցերը, դատախազությունը կամ հատուկ քննչական ծառայությունը հստակ ընդգծված անգործության են մատնում` խուսափելով պատասխանից: Նմանապես նաև մենք հանրաքվեի արդյունքների հետ կապված էինք դիմում ուղարկել և իրենք մեկ ամիս հետո, 2-րդ անգամ դիմելուց հետո նոր գրություն էին ուղարկել, որը մենք հիմա վիճարկում ենք դատարանում»:
Հիշեցնենք` Արթուր Սաքունցի դիմումի համար հիմք է հանդիսացել «Հանրապետություն» կուսակցության առաջնորդ Արամ Զավենի Սարգսյանի հայտարարությունը, թե Սերժ Սարգսյանն իրեն խոստովանել է, որ Հոկտեմբերի 27-ը կազմակերպված էր ու մի օր կասի՝ ով էր կազմակերպել։