0 8000 12 11

«Այսօր Սահմանադրության օրվա հետ կապված պետք է լիներ հանրային արժեւորում, ոչ թե հերթապահ ինչ -որ շնորհավորանքներ՝ ոչինչ չասող ու նույնաբովանդակ: Դա ինքնին վկայում է արդեն այն մասին, թե ինչպիսի տեղ, դեր ու նշանակություն ունի իրավական փաստաթուղթը՝ Սահմանադրությունը, ՀՀ-ում»,-ԳԱԼԱ-ի հետ զրույցում ասաց ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը՝ անդրադառնալով օրվա խորհրդին ու հիշելով, որ այսօր ՀՀ-ում Սահմանադրության օրն է:

Պարոն Սաքունցի խոսքերով՝ Հայաստանում Սահմանադրություն չկա, այն մի փաստաթուղթ է, որ ճիշտ կլինի կոչել Սահմանադրության ուրվական:

«Դա պայմանավորված է առաջին հերթին իշխանությունների որակով, որովհետեւ Սահմանադրությունը սահմանում է քաղաքացիների եւ պետական մարմինների փոխհարաբերությունները, դրանց իրականացման մեխանիզմներ որոշումների ընդունման կիրառման տեսակետից: Բայց ցավոք սրտի դրանք մնում են միայն հռչակագրային բնույթի եւ իրական կյանքում ամեն տեսակի հարաբերություն կարգավորվում են ոչ թե օրենսդրական նորմերով, այլ իշխանության կողմից ձեւավորված խաղի կանոններով: Այսինքն փաստացի չգրված կանոնները իրական կյանքում ունեն առաջնային նշանակություն»:

Պարոն Սաքունցի խոսքերով՝ ՀՀ Սահմանադրությունում դժվար է որեւէ հոդված մատնանշել, որ չխախտվի, բայց այս պահին առավել վտանգված են Սահմանադրության առաջին եւ երկրորդ հոդվածները:

«Առաջինը, որ ասում է որպես ինքնիշխան, ժողովրդավար, իրավական, սոցիալական պետություն, ու դա հիմնարար հոդվածն է, եւ ըստ էության այն վտանգված է, օրինակ դրանում եւս մեկ անգամ համոզվեցինք սեպտեմբերի երեքի հայտնի որոշումից հետո:

Եվ երկրորդ՝ իշխանությունը պատկանում է ժողովրդին: Սա էլ որպես դարձյալ հիմնարար սկզբունք գոյություն չունի: Այն խախտված եւ չիրականացված վիճակում է, որովհետեւ իշխանությունը ձեւավորվում է ոչ թե ժողովրդի կողմից, այլ ձեւավորվում է իր իսկ կողմից:

Սահմանադրական նորմերը որպես այդպիսին կարելի է ասել, որ ՀՀ գործում են այս տեսանկյունից, կամ ավելի շուտ Սահմանադրության մեկ դրույթ էլ, որ ՀՀ-ում գործում է միշտ անխախտ՝ իշխանությունը պատկանում է ՀՀԿ-ին եւ բոլոր որոշումները կայացվում են ՀՀԿ ղեկավարի կողմից: Սրանք փաստացի դրանք են գործում: Այլ դրույթներ «ՀՀ Սահմանադրություն» վերտառությամբ փաստաթղթի մեջ չեն գործում»,- ասաց իրավապաշտպանը:

Աղբյուրը՝ galatv.am