0 8000 12 11

Հելսինկյան քաղաքացիական ասամբլեայի Վանաձորի գրասենյակն արդեն տեղեկացրել է, որ ստանձնել է 2016 թվականի հունվարի 4-ին Արմավիր ՔԿՀ-ում մահացած 21-ամյա Անզոր Կարապետյանի իրավահաջորդների իրավունքների պաշտպանությունը:

Դեպքի առթիվ հարուցված քրեական գործի շրջանակներում 2016թ. փետրվարի 6-ին Ա. Կարապետյանի պապիկը` Բ. Կարապետյանը, ճանաչվել է տուժողի իրավահաջորդ և մասնակցում է քրեական գործի շրջանակներում կատարվող հարցաքննություններին: ՀՔԱ Վանաձորի գրասենյակի փաստաբան Անի Չատինյանը  ճանաչվել է տուժողի իրավահաջորդի ներկայացուցիչ:

Միաժամանակ Ա. Չատինյանը որպես փաստաբան մասնակցում է Անզոր Կարապետյանի ընտանիքի անդամների հարցաքննություններին. վերջիններս Ա. Կարապետյանին առաջադրված մեղադրանքի գործով հանդիսանում են վկաներ:

Հիշեցնենք, որ 2015 թվականի դեկտեմբերի 31-ին Արմավիր քաղաքում տեղի է ունեցել ծեծկռտուք, որին մասնակցել է նաև Անզոր Կարապետյանը, որից հետո Ա․Կարապետյանը ներկայացել է ոստիկանություն, նրան ձերբակալել են, այնուհետև 2016 թվականի հունվարի 3-ի երեկոյան դատարանի որոշմամբ կալանավորվել է, գիշերը տեղափոխվել Արմավիր ՔԿՀ և ժամեր անց մահացել:

Ա. Կարապետյանին մեղադրանք է առաջադրվել ՀՀ Քրեական օրենսգրքի 34-104 հոդվածի (սպանության փորձ) հատկանիշներով:

ՀՔԱ Վանաձորի գրասենյակի փաստաբանի կողմից դիմում է ներկայացվել վարույթն իրականացնող մարմնին՝ հարուցված քրեական գործի շրջանակներում որպես Ա. Կարապետյանի պաշտպան ներգրավվելու վերաբերյալ: