0 8000 12 11

2017 թ. հուլիսի 11-ին ՀՀ Վարչական դատարանում շարունակվեց զորակոչիկ Հովհաննես Մոսյանի առողջական վիճակի մասին ՀՀ Կենտրոնական բժշկական հանձնաժողովի որոշումը վերացնելու վերաբերյալ հայցի քննությունը:

Հիշեցնենք` Հովհ. Մոսյանն ու նրա ներկայացուցիչ, ՀՔԱ Վանաձորի գրասենյակի Երևանի ներկյացուցչության իրավաբան Տ. Սիրադեղյանը պահանջում են կիրառել ՀՀ պաշտպանության նախարարի 2013 թվականի ապրիլի 8-ի թիվ 410-Ն հրամանի այլ դրույթ և տարկետում տրամադրել ոչ թե 10 ամիս, այլ 3 տարի ժամկետով:

Նախորդ դատական նիստը հետաձգվել էր հայցվոր կողմի՝ դատարան ներկայացրած ապացույցի օրինակը պատասխանող ՀՀ Կենտրոնական բժշկական հանձնաժողովին տրամադրելու նպատակով:

Դատական նիստը կայացավ հայցվորի ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանի մասնակցությամբ: 

Դատարանը հայտնեց, որ ստացվել է հայցվորի ներկայացուցչի գրությունը, որին կցվել է նաև դատարան ներկայացված ապացույցը  ՀՀ Կենտրոնական բժշկական հանձնաժողովին ուղարկելը հավաստող անդորրագիրը, իսկ Հանձնաժողովը որևէ դիրքորոշում դրա վերաբերյալ չի ներկայացրել:

Տ. Սիրադեղյանը դատարան ներկայացրեց գործին առնչվող այլ նյութեր ևս և պնդեց ավելի վաղ միջնորդությամբ ներկայացված դիրքորոշումը:

Այդպիսով, դատարանը գործի քննությունը համարեց ավարտված՝ վճռի հրապարակման օր նշանակելով 2017 թ. հուլիսի 27-ը՝ ժամը 17:50-ը: