0 8000 12 11

Հուլիսի 19-ին Սարի թաղի դեպքերով կալանավորված Հրաչյա Բոյաջյանը կշարունակի մնալ կալանքի տակ: Վերաքննիչ քրեական դատարանն այսօր մերժել է պաշտպանական կողմի միջնորդությունը:

Պաշտպան Արայիկ Զալյանն «Ա1+»-ին հայտնեց, որ ինչպես իր պաշտպանյալի, այնպես էլ Սարի թաղի գործով անցնող մյուս 8 անձանց մեղադրանք առաջադրելն անհիմն է: Նրանց գործողություններին էլ ոչ ճիշտ եւ անհիմն իրավական գնահատական է տրվել, ինչպես նաեւ չեն պարզել, թե ինչու են նրանք դուրս եկել փողոց։

«Ցուցարարները, ինչպես նաեւ Հրաչյա Բոյաջյանը բողոքի ակցիա են իրականացրել՝ իրենց դժգոհությունն  արտահայտելով  թաղամասում գազամատակարարման, ջրամատակարարման, էլեկտրաէներգիայի մատակարարման և երթուղային տրանսպորտի աշխատանքը դադարեցնելու առնչությամբ»,- ասաց պաշտպանը:

Արայիկ Զալյանի խոսքերով՝ մեղադրանքի հիմքում դրվել է միայն այն տեսանյութը, թե ինչպես են ցուցարարները հարվածում ոստիկաններին, սակայն չգիտես ինչու բացակայում է երկրորդ  տեսանյութը, որտեղ ոստիկանները, այդ թվում նաեւ քաղաքացիական հագուստով անձինք,  իրենց ամրակցված զենքերով  փորձել են վախի մթնոլորտ ստեղծել, հայհոյել են, ինչն էլ զայրացրել է  ցուցարարներին: «Ոստիկանների գործողություններին գնահատական չի տրվել»,- ասում է  Հելսինկյան Քաղաքացիական Ասամբլեայի  Վանաձորի գրասենյակի փաստաբան Արայիկ Զալյանը:

Նրա համար տարօրինակ է, որ Սարի թաղի բնակիչներին մեղադրանք է առաջադրվել  իշխանության ներկայացուցչի նկատմամբ վտանգավոր բռնություն գործադրելու հատկանիշներով, մինչդեռ նրանք ցանկացել են պարզել, թե ինչու են իրենց իրավունքները ոտնահարվում:

Միեւնույն ժամանակ Արայիկ Զալյանը հիշեցնում է, որ իր պաշտպանյալ Հրաչյա Բոյաջյանը ունի առողջական խնդիրներ ոչ շաքարային դիաբետ եւ հենց այդ հիմքով էլ ազատվել է զինվորական ծառայությունից:

Իշխանության ներկայացուցչի նկատմամբ վտանգավոր բռնություն կատարելու գործն արդեն ուղարկվել է Երեւանի Էրեբունի եւ Նուբարաշեն վարչական շրջանների ընդհանուր իրավասության դատարան, սակայն նիստի օր դեռ չի նշանակվել: